Այսօր Հայաստանի գավաթի խաղարկության կիսեզրափակիչ առաջին խաղում «Միկա»-ն համանուն մարզադաշտում ընդունել էր «Բանանց»-ին: Երկու թիմերը համատեղ 6 գնդակ ուղարկեցին միմյանց դարպասները, սակայն այդպես էլ հաղթողն ի հայտ չեկավ:
Հանդիպման 17-րդ րոպեին «Բանանց»-ի հարձակվող Բրունո Կորեան, օգտվելով տանտերերի պաշտպանների սխալից, առաջ մղեց իր թիմին: 9 րոպե անց նույն Բրունո Կորեան ձախ եզրից գեղեցիկ անցում կատարեց և ճշգրիտ փոխանցումով հարվածային դիրք դուրս բերեց Վալտեր Պողոսյանին, ով կրկնապատկեց հաշիվը:
33-րդ րոպեին «Միկա»-ի ֆուտբոլիստներին հաջողվեց կրճատել հաշվի տարբերությունը: Արմեն Պետրոսյանի փոխանցումից հետո Նարեկ Բեգլարյանը գլխի հարվածով գնդակն ուղարկեց անպաշտպան դարպասը: Առաջին խաղակեսի ավելացված ժամանակում հյուրերին հաջողվեց ևս մեկ գնդակ ուղարկել Գևորգ Կասպարովի դարպասը:
Արսեն Բալաբեկյանի անկյունայինից կատարած փոխանցումից հետո գլխի դիպուկ հարվածով աչքի ընկավ վնասվածքի պատճառով Հայաստան-Ռուսաստան հանդիպումը բաց թողած Արարատ Առաքելյանը:
Երկրորդ խաղակեսի մեկնարկից Արմեն Շահգելդյանը խաղադաշտ դուրս բերեց չինացի լեգեոներ Դոն Ֆունժուին, ումից 7 րոպե պահանջվեց հաշվի տարբերությունը կրկին նվազագույնի հասցնելու համար: Չնայած «Միկա»-ի ֆուտբոլիստներն անընդհատ գրոհում էին և Օդոլսկու դարպասին հարվածելու առիթը բաց չէին թողնում, սակայն միայն մրցավարի ավելացրած ժամանակի 3-րդ րոպեին նրանց հաջողվեց հավասարեցնել հաշիվը: «Միկա»-«Բանանց»` 3:3:
