Այսօր՝ հունվարի 2-ին, դժբախտ պատահար է տեղի ունեցել Երևանում: Ժամը 17:30-ի սահմաններում Երևան քաղաքի Սարիթաղի 12 փողոցի բնակիչ, 53-ամյա Վալերի Մելքոնյանը, վարելով Ռենո մակնիշի Լ2135 համարանիշի ավտոմեքենան, Հարավարևմտյան թաղամասի Բաբաջանյան փողոցում (Բլեյանի դպրոցի մոտ), դուրս է եկել ճանապարհի հանդիպակաց փողոց և բախվել Երևան քաղաքի բնակիչ Մանվել Գաբրիելյանի վարած Ռենո մակնիշի Տ6047 համարանիշի ավտոմեքենային, իսկ այնուհետև բախվել ծառին:
Ինչպես հայտնում է shamshyan.com-ը, Վ. Մելքոնյանը տեղափոխվել է Մալաթիայի բժշկական կենտրոն, որտեղ մահացել է: Ըստ նախնական տեղեկությունների՝ Վ. Մելքոնյանը մեքենան վարելու ժամանակ հանկարծամահ է եղել և այդ վիճակում մեքենան բախվել է մեկ այլ ավտոմեքենային, իսկ հետո՝ ծառին:
Դեպքի վայր են ժամանել Երևանի Ճանապարհային ոստիկանության աշխատակիցները Երևանի ՃՈ պետ Արսեն Արշակյանի գլխավորությամբ: Վթարի վայրում քննչական աշխատանքները ղեկավարել է ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի ավագ քննիչ Դավիթ Մարտիրոսյանը:
Քննիչի հանձնարարականով նշանակվել են մի շարք փորձաքննություններ: Վ. Մելքոնյանը աշխատում էր «Արմա» տաքսի ծառայությունում, իսկ Մ. Գաբրիելյանը՝ «Նոյ» տաքսի ծառայությունում:
