«Գերազնց տարի էր ինձ համար թե´ անձնական կյանքում, թե´ մասնագիտականում` սպորտում: Հնարավոր եղավ նվաճել այդքան սպասված Օլիմպիական մեդալ, որն անչափ կարևոր է ցանկացած մարզիկի համար, նաև մեր ազգի, մեր ժողովրդի համար: Կարողացանք բարելավել Պեկինի Օլիմպիական խաղերի արդյունքը և ամուսնացա, շատ երջանիկ եմ»,- 1in.am Sport-ի հետ զրույցում նշեց Լոնդոնի Օլիմպիական խաղերի արծաթե մեդալակիր, Հայաստանի 2012 թվականի լավագույն մարզիկ Արսեն Ջուլֆալակյանը:
«Ամուսնությունից հետո դառնում ես ավելի պատասխանատու, ավելի հավաքված, մտածում ես ոչ միայն քո, այլև քո սիրած էակի մասին: Կյանքն առաջ է գնում և չես կարող նույն տեղում, նույն կարգավիճակում մնալ, դա ժամանակի թելադրանք է:
2013թ. գլխավոր նպատակս Աշխարհի չեմպիոն դառնալն է:
Մոտ երկու ամիս բացակայել եմ Հայաստանից և շատ կարոտել եմ, որոշել եմ մնալ տանը, հարազատներիս, ընտանիքիս հետ դիմավերելու եմ Ամանորը: Անակնկալներ շատ եմ սիրում: Սիրում եմ տոները նշել յուրովի:
Կինս շատ անակնկալներ է պատրաստել ինձ համար: Ծննդյանս օրն արթնացա և գնացի լոգարան, այն տեսա զարդարած, ծննդյան տորթ, փուչիկներ, շնորհավորանքներ… և այդ ժամանակ տանը բացի ինձնից ոչ ոք չկար: Միշտ անակնկալներ են լինում, երբ վերադառնում եմ մրցումներից: Այս անգամ նա եկել էր Ծաղկաձոր և հերթական անակնկալը պատրաստել, որը ես երբեք չէի կարող սպասել: Կիրակի օրը մարզումներ չկային, և երբ ես մտա սենյակ, այն տեսա զարդարած…
Շնորհավորում եմ բոլորի Ամանորը, ցանկանում եմ, որ սիրենք միմյանց, հարգենք, լինենք հանդուրժող, զիջենք իրար և շարունակենք զարգացնել մեր երկիրը»:
