ՀՀ վաստակավոր արտիստուհի, ասմունքող Սիլվա Յուզբաշյանն ամփոփել է 2012-ը:
Հարցին, թե անցնող 2012-ում ի՞նչ ձեռքբերումներ կային, նա պատասխանեց. «Մեր ժողովրդի ապրած հազարավոր տարիների վրա ավելացավ ևս մեկը, ուրեմն մեկ տարով էլ ծերացավ Երկիր մոլորակը, հայ ժողովուրդը: «Ես շատ կուզեի հակառակվել բնությանը ու տեսնել մեր ազգի երիտասարդացումը: Գիտեմ, որ ժողովուրդը երիտասարդանում է խաղաղ, արժանապատիվ, բարեկեցիկ կյանքի մեջ, երիտասարդանում է արարելով, հարստացող մշակույթով, խաղաղ կյանքի մեջ կատարված մեծագործություններով…»:
Սիլվա Յուզբաշյանը նշեց, որ 2012 թ. վերջապես ունեցավ «Լռնության արձագանքներ» անունով շքեղ ձայներիզ-ալբոմը, որի համար շնորհակալություն հայտնեց ՀՀԿ կանանց խորհրդին, մասնավորապես՝ Հերմինե Նաղդալյանին:
«Տարվա վերջում սփյուռքի նախարար Հրանուշ Հակոբյանը Ազատ Գասպարյանի հետ ինձ գործուղեց արևմտյան կիսագունդ, և մենք Արգենտինայում, Ուրուգվայում և Բրազիլիայում հրաշալի պոեզիայի երեկոներով հանդես եկանք այդ երկրներում ապրող հայ ունկնդրի առջև։ Անմոռանալի օրեր էին, հայաշունչ, ջերմ, կազմակերպված համայնքներ էին՝ ազգային շքեղ կառույցներով…»:
Սիլվա Յուզբաշյանն անդրադարձավ նաև այս տարվա ձախողումներին. «Անկեղծ ասած, մարդկային հոգին նյութին հպատակեցնող այս պրոզայիկ ժամանակներում, համատարած շոուի հաղթարշավի մեջ, բոմոնդի, գլամուրի մեջ ասմունքով զբաղվելը արդեն ձախողում է»:
Նա խոսեց նաև իր ցանկությունների մասին. «Բոլորս էլ մանկան անհամբերությամբ ենք սպասում Նոր տարվա գալուն, որից ակնկալում ենք հրաշալի, գեղեցիկ հայտնություններ, բարի իրագործումների շատ օրեր, հոգևոր, նաև նյութական հարստություն, ամենակարևորը՝ հավատ հողի, երկրի, գալիքի հանդեպ… Շատ կուզեի, գինով լի բաժակները, որ պիտի բարձրացնենք, երբեք չպղտորվի… Իմ սիրելի գրողի՝ Սարոյանի խոսքերով ասեմ. «Փնտրիր բարին ամենուրեք, և թող նա լինի ազատ ու աներկյուղ։ Արթնացրու առաքինությունը… Եվ քանի ապրում ես ոչ մի բան չավելացնես աշխարհի աղետներին և տխրությանը, այլ ժպտա կեցության անծայր խնդության ու գաղնիքի հանդեպ»»:
