Մադրիդի «Ռեալ»-ի գլխավոր մարզիչ Կարլո Անչելոտին հայտարարել է, որ սխալ արտահայտություն է կատարել ՖԻՖԱ-ի նախագահ Զեպ Բլատերի հասցեին:
Հիշեցնենք` մեկնաբանելով Բլատերի խոսքերն աշխարհի 2014 թվականի առաջնության լավագույն ֆուտբոլիստի մասին, իտալացի մասնագետը նշել էր, որ ՖԻՖԱ-ի նախագահի բերանը հնարավոր չէ փակել: Ավելի վաղ Բլատերը հայտարարել էր, որ Մունդիալի «Ոսկե գնդակ»-ին արժանի էր ոչ թե Արգենտինայի հավաքականի հարձակվող Լիոնել Մեսսին, այլ Գերմանիայի ազգային թիմի դարպասապահ Մանուել Նոյերը: Մինչդեռ Անչելոտին կարծել է, որ խոսք է գնում աշխարհի 2013 թվականի լավագույն ֆուտբոլիստի կոչման մասին, և նա հայտարարել է, որ Քրիշտիանու Ռոնալդուն արժանի էր այդ մրցանակին:
«Պետք է հետ վերցնեմ Բլատերին հասցեագրած խոսքերս: Նա խոսել է աշխարհի առաջնության «Ոսկե գնդակ»-ի մասին և այդ առումով ես նրա հետ համամիտ եմ»,- AS-ը մեջբերում է Անչելոտիի խոսքերը:
