Այսօր ԱԺ սոցիալական հարցերի մշտական հանձնաժողովի կողմից «Ժամանակավոր անաշխատունակության նպաստների մասին» ՀՀ օրենքում լրացումներ և փոփոխություններ կատարելու մասին», «Պետական նպաստների մասին» ՀՀ օրենքում փոփոխություններ կատարելու մասին», «Եկամտային հարկի մասին» ՀՀ օրենքում փոփոխություն կատարելու մասին» օրենսդրական փաթեթը քննարկելու նպատակով այս պահին ընթանում են խորհրդարանական լսումներ: Այս առումով իրենց վրդովմունքն արտահայտեցին նաև հղի կանայք, քաղաքացիները:
Տաթևիկ Դավթյանը, ով սպասում է երկրորդ երեխային, վրդովված նկատեց, որ պոտենցիալ խարդախություն է. «Դուք հասկանո՞ւմ եք, թե՞ ոչ, բայց սա պետական դիսկրիմինացիայի ներդրում է. դուք այս օրենքով փաստացի ինձ ասում եք, որ ես ստորադաս եմ տղամարդուն, քանի որ նրան զորավարժությունների ժամանակ հարյուր տոկոսով եք փոխհատուցում: Օժանդակելու փոխարեն՝ դուք խլում եք գումար՝ դնելով դժվարին վիճակի մեջ:
Ասում եք՝ Հայաստանում տասներկու հազար կին է աշխատում, և դա մեծ թիվ չէ: Կարելի է կարծել, որ աշխատող կինը ամոթալի բան է: Կինը մայրանում է, ակնկալում, որ պետությունը իրեն պետք է աջակցի, բայց դուք երես եք թեքում կնոջից, մորը զրկում ապահովության զգացումից, որ ինքը պետք է ունենա արձակուրդ գնալուց առաջ՝ փոխանակ կարևորելով այն դերը, որը անում է մայրը հասարակության համար:
Կներեք, բա զինվորները ինկուբատորներո՞ւմ են աճում: Ցավալի է, որ մոր և զինվորի կապը դուք չեք տեսնում, դուք այդ մորը հարվածում եք, մոր ամբողջ հավատը պետության նկատմամբ խարխլում: Այս երկրում ես ուզում եմ հանգիստ լինել, իսկ դուք ինձ հանգստություն չեք տալիս»,- ասաց նա:
Տաթևիկը նշեց, որ իր առաջարկը մեկն է՝ ՀՀ-ում բոլոր աշխատող մայրերը պետք է հարյուր տոկոսի չափով փոխհատուցվեն:
Լուսանկարը՝ Pan Photo-ի
