Սերժ Սարգսյանի հրավերով մարտի 31-ին երկօրյա պաշտոնական այցով Հայաստան կժամանի Շվեյցարիայի Համադաշնության նախագահ Միշելին Կալմի-Ռեյը: Այցի շրջանակներում Շվեյցարիայի նախագահը հանդիպումներ կունենա Հայաստանի բարձրագույն ղեկավարության հետ, կայցելի Մայր Աթոռ Սուրբ Էջմիածին և հանդիպում կունենա Ամենայն Հայոց կաթողիկոսի հետ, կայցելի Գանձարան և Մայր տաճար: Նախագահ Միշելին Կալմի-Ռեյը կմասնակցի նաև Հայաստանում Շվեյցարիայի դեսպանատան բացման արարողությանը:
«Առաջին լրատվականը» հարց ուղղեց Հայ ազգային կոնգրեսի արտաքին հարաբերությունների հանձնաժողովի ներկայացուցիչ Մարթա Այվազյանին՝ ի՞նչ նպատակ ունի Շվեյցարիայի նախագահի այցը, և արդյոք հայ-թուրքական հարաբերությունների վերակենդանացման թեման կարո՞ղ է գլխավոր հարցերից մեկը լինել նրա այցի ընթացքում:
«Ըստ ամենայնի, հայ-թուրքական հարաբերությունների հարցը կլինի օրակարգի հիմնական հարցերից մեկը, եթե ոչ` գլխավորը: Ամեն դեպքում Հայաստան-Թուրքիա հարաբերությունների կարգավորումը մնում է օրակարգում, մանավանդ այն երկրի համար, որը Շվեյցարիան է, որը հյուրընկալել էր Հայաստանին և Թուրքիային, որոնց միջև արձանագրությունների ստորագրման միջոցառումը տեղի ունեցավ:
Այսինքն` քաղաքական ոլորտում, բացի Հայաստանի և Թուրքիայի միջև հարաբերությունների կարգավորումից, այլ հարց հազիվ թե լինի: Ինչ վերաբերում է Ղարաբաղյան խնդրին, ապա Շվեյցարիան այդ գործընթացում ակտիվ խաղացող չէ, և եթե շոշափվի` ապա հավանաբար հայ-թուրքական հարաբերությունների կարգավորման հարցի շրջանականերում»,- պատասխանեց Մ.Այվազյանը:
Մարթա Այվազյանը ուշադրություն հրավիրեց նաև այն հանգամանքին, որ Շվեյցարիայի նախագահի այցը փաստորեն մոտ է ապրիլի 24-ին, երբ ամեն տարի հենց այս շրջանում ակտիվանում են Հայոց Ցեղասպանության, հայ-թուրքական հարաբերությունների կարգավորման հարցերը:
