Եգիպտոսի նոր կառավարությունը արմատապես փոխում է միջազգային քաղաքականությունը։ Նա ուզում է բարիդրացիական հարաբերություններ հաստատել «Հըզբոլլահ» ահաբեկչական կազմակերպության հետ։ Այս մասին հայտարարել է Լիբանանում Եգիպտոսի դեսպան Աշրաֆ Համդին։ Նրա հարցազրույցը հրապարակել է լիբանանյան Daily Star-ը։
Դեսպանը «Հըզբոլլահին» համարել է իրական քաղաքական և զինվորական ուժ, որը մեծ ազդեցություն ունի Լիբանանում։ Նա ցանկություն է հայտնել, որ կազմակերպությունը մնա ազդեցիկ և գործի Լիբանանի շահերին համապատասխան։
Համդին օրինական է համարել «Հըզբոլլահի» գործունեությունը և հավելել, որ այն պայքարում է Իսրայելի կողմից Լիբանանի գրավյալ տարածքները ազատագրելու համար։
Դեսպանը հարցազրույցում հերքել է, որ «Հըզբոլլահը» պատվիրակություն է ուղարկել նախագահ Մուրսիի հետ հանդիպման, սակայն ինքն անձամբ հանդիպել է կազմակերպության քաղբյուրոյի անդամների հետ` «միմյանց լավ հասկանալու համար»։
«Հըզբոլլահի» հարաբերությունները Եգիպտոսի հետ Մուբարաքի ժամանակ բավականին լարված էին վերջինիս` Իսրայելի հետ խաղաղության պայմանագիր կնքելու պատճառով։ Եվ այդ հարաբերությունները առավել լարվել էին էին 2008-ին, երբ «Հըզբոլլահի» ղեկավարությունը հորդորում էր Եգիպտոսին ռազմական միջամտություն ցուցաբերել պաղեստինյան Գազայում, սակայն` ապարդյուն։
