Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ սկսվում է Անուշիկ Դ.-ի գործի դատական քննությունը:
Ըստ մեղադրանքի՝ 2014 թվականի ապրիլի 12-ի լույս 13-ի գիշերը Անուշիկն իր նախկին ամուսնուն տեսակցելու և գումար խնդրելու նպատակով գնացել է Նոր Խարբերդում գտնվող նրա տուն:
Օգտվելով նախկին ամուսնու բացակայությունից և տան մյուս բնակիչների՝ քնած լինելու հանգամանքից, տանից դուրս գալու ժամանակ ուրիշի գույք գողանալու՝ հանկարծակի ծագած դիտավորությամբ Անուշիկը գողացել է նախկին ամուսնուն պատկանող «Դել» մոդելի դյուրակիր համակարգիչը:
Հաջորդ օրը Անուշիկը գողացված համակարգիչը 15 հազար դրամով վաճառել է իրեն անծանոթ անձին՝ նախկին ամուսնուն պատճառելով 130 հազար դրամի գույքային վնաս:
Անուշիկը մեղադրվում է գողության համար՝ ՀՀ քրեական օրենսգրքի 177 հոդվածի 1-ին մասով: Նրա խափանման միջոցը ստորագրությունն է չհեռանալու մասին:
