Գյուղերում վարչապետի վերջին շրջայցերի և խորհուրդների շուրջ այսօր լրագրողները փորձեցին լսել «Հայաստանի ագրարագյուղացիական միավորում» ՀԿ-ի նախագահ Հրաչ Բերբերյանի կարծիքը։
Նա ասաց, թե չի ցանկանում կոպիտ արտահայտվել, պարզապես այդտեղ տեղեկատվության պակաս կա։ Դա պայմանավորված է նաև նախագահի ծաղկաձորյան հանձնարարականով, հետևաբար հիմա տարբեր պաշտոնյաներ փորձում են գնալ գյուղեր և ցույց տալ իրենց աշխատասիրությունը։
«Բայց կարևորն այն է, որ նախագահը հասկացել է՝ վիճակը վատ է, և եթե այս ամենը ժամանակավոր չլինի, ներդրված գումարները բուն նպատակին ծախսվեն և ոչ թե գրպանվեն, լուրջ փոփոխությունների կհասնենք։ Այնինչ, այսօր ոլորտի պատասխանտուներից շատերը այնտեղ են աթոռներ զբաղեցնելու և գումարներ գրպանելու համար։ Հետևաբար կարևոր է, որ միաժամանկ պայքար մղվի ոչ թե միայն դաշտային կրծողների, այլև պետական ապարատներում աշխատող կրծողների դեմ։ Այս դեպքում միայն հաջողությունների կհասնենք»,- արձագանքեց Հրաչ Բերբերյանը։
Նա նաև ասաց, թե ով չգիտի, որ գյուղացուն վարկեր են տրամադրում։ Այլ հարց է, թե ինչ միջոցներով են այդ վարկը գյուղացուն տրամադրում։ Օրինակ՝ Համաշխարհային բանկը 0.75 տոկոսով է վարկը տրամադրում, այնինչ այդ գումարները մեր գյուղացիներին 24 տոկոսով են տալիս։ Բայց դրա համար ոչ ոք չի պատժվում։ Այնինչ նախագահը ելույթից հետո սկսեց խոսել վարկերի մասին։
Հրաչ Բերբերյանը խոսեց նաև ջրի խնդրից և առաջարկեց, որ կարելի է ֆերմերային կազմակերպություններ ստեղծել, ինչի արդյունքում ջուրը ՋՕ-երից կարող են գնել, ոչ թե 11 դրամով, այլ 4.5 դրամով։ Առաջարկեց նաև, որ ապահովագրության ոլորտում լինի բաժնետեր, ինչի միջոցները և նախադեպերը կան։
