Սրանից դեռևս մի քանի ամիս առաջ ֆրանսիական «Նոր Յառաջ»-ը տեղեկացրել էր, որ ֆրանսահայ համայնքի հայտնի երկու դեմքերի՝ գործարար Ռեմոն Եզեկելյանի, որը ներկայում նաև «Նոյան Տապան» ֆրանսերեն հրատարակության հովանավորն է, և «Նուվել դ՚Արմենի Մակազին»-ի խմբագրապետ, միաժամանակ CCAF-ի համանախագահ Արա Թորանյանի վեճը հասել էր դատարան: Նրանց թյուրիմացության պատճառն այն էր, թե խախտվել է վարձակալության պայմանների շուրջ եղած համաձայնությունը:
Այժմ հաղորդվում է, որ նոյեմբերի 26-ին, Ֆրանսիայի Թեմակալ առաջնորդ Նորվան արք. Զաքարյանի միջնորդությամբ, հավանաբար, հաշտության եզր է գտնվել, և Ռեմոն Եզեկելյանը որոշել է հետ վերցնել բողոքը՝ ընդդեմ Արա Թորանյանի։ Նրանք նաև համաձայնել են միմյանց նկատմամբ թույլ չտալ անվանարկող արտահայտություններ և այսուհետև դադարեցնել անձնական ամեն տեսակի հարձակում:
Այս մասին Փարիզի Առաջնորդարանում կնքվել է համաձայնագիր, որով կավարտվի ավելի քան երկամյա հակամարտությունը:
