Apple-ի գլխավոր տնօրեն Թիմ Կուկը 2012 թ. 4,17 միլիոն դոլար է վաստակել՝ անցած տարվա 378 միլիոն դոլար փոխհատուցման փաթեթի դիմաց։ Այս մասին վկայում են Apple-ի փաստաթղթերը, որոնք հանձնվել են ԱՄՆ Արժեթղթերի և բորսաների հանձնաժողովին:
Այդպիսի հսկայական տարբերությունը բացատրվում է նրանով, որ 2011 թ. Կուկը փոխհատուցման փաթեթի կազմում ստացել է 376,2 միլիոն դոլար արժողությամբ արժեթղթեր: Փաստացի Կուկը կարող է դրանք ստանալ միայն այն դեպքում, եթե կմնա ընկերությունում Apple-ը ղեկավարելուց սկսած տասը տարիների ընթացքում: Կուկն արժեթղթերի առաջին կեսը կստանա 2016 թ., իսկ երկրորդը՝ 2021 թ.:
Apple-ի հիմնադիր լեգենդար Սթիվ Ջոբսը, ով երկար տարիներ ղեկավարել է ընկերությունը, հայտնի է նաև նրանով, որ Apple-ի ղեկավարի պաշտոնում նրա տարեկան եկամուտը մեկ դոլար է կազմել:
Սթիվ Ջոբսը մահացել է 2011 թ.՝ մինչ այդ Apple-ի կառավարումը հանձնելով Կուկին:
