Armtimes.am-ը գրում է. «Հունիսի 27-ին Վրաստանը՝ Ուկրաինայի եւ Մոլդովայի հետ Բրյուսելում ստորագրեց Եվրամիության հետ ասոցացման եւ խորը առեւտրի մասին համաձայնագիրը:
Շուրջ 1000 էջից բաղկացած այս համաձայնագիրը, որը ենթադրում է խորացված համագործակցություն 28՝ մեծամասամբ առեւտրին եւ տնտեսական համագործակցությանն առնչվող ոլորտներում, արդեն իսկ միաձայն հաստատվել է Վրաստանի օրենսդիրի կողմից, իսկ Եվրոպական խորհրդարանն այն նախատեսում է հաստատել այս տարվա դեկտեմբեր ամսին, ինչից հետո էլ փաստաթուղթը վերջնականապես ուժի մեջ կմտնի:
Հարկ է նշել, սակայն, որ Եվրամիության հետ ասոցացման՝ խորը եւ համապարփակ առեւտրի մասին համաձայնագիրն ինքնին չի նշանակում անդամակցություն Եվրամիությանը: Պայմանագրի շրջանակներում կողմերի ստանձնած պարտավորությունների կատարման պարագայում մի քանի տարվա ընթացքում Եվրամիությանն անդամակցելու Վրաստանի հայտը, որի վերաբերյալ երկրի նախկին նախագահ Միխաիլ Սահակաշվիլին քաղաքական հայտարարությամբ էր հանդես եկել դեռեւս 2011 թվականին, կարող է մտնել 28 երկրներից բաղկացած Միության օրակարգ: Մի կողմ թողնելով ստորագրված փաստաթղթի քաղաքական նշանակությունը՝ կենտրոնանանք դրա տնտեսական ազդեցության որոշ մանրամասների վրա:
Թերեւս, առավել կարեւորն այն է, որ փաստաթղթի՝ ուժի մեջ մտնելու պահից Վրաստանը հնարավորություն է ստանում չափերով աշխարհի ամենամեծ շուկա՝ Եվրամիության անդամ պետություններ, իր արտադրությանը պատկանող ապրանքներ արտահանել՝ առանց մաքսային վճարներ իրականացնելու, մինչդեռ ԵՄ-ից Վրաստան ներմուծվող ապրանքների մաքսային վճարումները թեթեւացվելու եւ միայն մի քանի տարվա կտրվածքով են վերջնականապես հանվելու: Զուգահեռաբար, դեպի Եվրոպա արտահանվող ապրանքները պետք է համապատասխանեն որակի եվրոպական ցուցանիշներին, ինչը եւս երկարաժամկետ գործընթաց է:
Այսուհանդերձ, սահմանվել են Վրաստանից ԵՄ արտահանվող ապրանքների չափաքանակներ՝ քվոտաներ: Այսպես, օրինակ, մեկ տարվա կտրվածքով Վրաստանից եվրոպական շուկաներ արտահանվող մսամթերքի քանակը չի կարող գերազանցել շուրջ 5000 տոննան, շաքարավազը՝ 8000, ծխախոտը՝ 500, կաթնամթերքը շուրջ 2000 տոննան, եւ այլն: Ըստ կանխատեսումների, առանց մաքսային սակագների Վրաստանից ԵՄ արտահանվելիք ապրանքների առյուծի բաժինը՝ շուրջ 62%-ը, բաժին է հասնում քիմիական, պլաստիկե եւ ռետինե ապրանքներին:
Ամբողջությամբ՝ аrmtimes.am-ում
