ԱՄՀ հայաստանյան առաքելության ղեկավար Մարկ Հորթոնը օրերս հայտարարեց, որ հիմնադրամը կտրուկ իջեցրել է Հայաստանի այս տարվա տնտեսական աճի կանխատեսումը՝ այն հասցնելով 2.6 տոկոսի՝ դա հիմնականում բացատրելով ՌԴ-ի դեմ կիրառվող պատժամիջոցներով: Մինչդեռ ՀՀ կառավարությունը շարունակում է պնդել, որ այս տարի սպասվում է 4 տոկոս տնտեսական աճ:
Այսօր «Առաջին լրատվական»-ի հարցին՝ կառավարությունը հաշվի առնելո՞ւ է ԱՄՀ կանխատեսումը, և որքա՞ն իրական տնտեսական աճ է սպասվում Հայաստանին այս տարի, էկոնոմիկայի նախարար Կարեն Ճշմարիտյանը պատասխանեց. «Իհարկե, պետք է հաշվի առնել, բայց նրանց կանխատեսումները միշտ ավելի զգուշավոր են»:
Ուստի ՀՀ կառավարությունը չի փոխի տնտեսական աճի ակնկալվող ցուցանիշը: «Այսօր հրատապ որևէ բան փոխելու կարիք չենք տեսնում»,- հայտարարեց նախարարը՝ հավելելով, որ Արևմուտք-Ռուսաստան պատժամիջոցների կիրառումը, իհարկե, զգացնել է տալիս:
Ըստ Ճշմարիտյանի՝ ԱՄՀ կանխատեսումները իրենք հաշվի կառնեն հետագայում, չնայած նշենք, որ ԱՄՀ կանխատեսումը վերաբերում է այս տարվա տնտեսական աճի ցուցանիշին:
Առավել մանրամասն՝ տեսանյութում:
