«Ուրմիա լիճի ջուրը բարձրացել է 25 սմ-ով»,- տեղեկացնում է իրանական Mehr գործակալությունը:
Ընդ որում` այս տարի ջրի մակարդակն անցած տարվա համեմատ 15 սմ-ով ցածր է:
Ուրմիա լճի տարածքը 6 000 ք/կմ է: Չվող թռչունները ժամանակավոր ապաստան են գտնում այդ լճի տարածքում: Երկարատև երաշտի պատճառով Ուրմիան ցամաքում է, ինչն իր ազդեցությունն է թողնում շրջակա միջավայրի վրա: Մասնագետների կարծիքով՝ իրանական կառավարության ձեռնարկած միջոցները բավական չեն լճի փրկության համար:
Ըստ բնապահպանների՝ Ուրմիա լճի փրկության համար 3,1 միլիարդ խորանարդ մետր ջուր է անհրաժեշտ: Լճի ամեն լիտրը 330 գրամ աղ է պարունակում: Ավելի վաղ այդ ցուցանիշը մեկ լիտրում 160-170 գրամ էր կազմում:
2010 թվականին հաստատվել է Արազ գետից Ուրմիա լիճ 600 միլիոն խորանարդ մետր ջուր տեղափոխելու ծրագիրը: Այդ ծրագրի իրականացման համար հատկացվել է 1,2 միլիարդ դոլար:
2011 թ. սեպտեմբերին իրանական կառավարությունը 900 միլիոն դոլար է հատկացրել լիճը ցամաքելուց փրկելու համար:
ՄԱԿ-ի զարգացման ծրագիրն Իրանին 135 միլիոն դոլար է հատկացրել Ուրմիա լճի բնապահպանական խնդիրների լուծման համար:
