Բնապահպան, Հանրային խորհրդի անդամ Կարինե Դանիելյանը լրագրողներին տեղեկացրեց, որ ներկայումս ԵԱՀԿ-ի ֆինանսավորմամբ հատուկ ծրագիր է իրականացվում, և արդեն իսկ մշակվում են առաջարկություններ, որոնք հնարավորություն կընձեռեն տրանսպորտը դուրս բերել այս քաոսային վիճակից:
«Երևանում գործող տրանսպորտը ամենաաառաջնային էկոլոգիական խնդիրն է, և օդային ավազանի աղտոտվածության 90 տոկոսը բաժին է հասնում հենց տրանսպորտին»,- կարծիք հայտնեց Դանիելյանը:
Հանրային խորհրդի անդամ Հովհաննես Հովհաննիսյանն էլ նշեց, որ տրանսպորտի, ինչպես նաև քաղաքին վերաբերող մյուս խնդիրներին, անհրաժեշտ է համակարգված մոտեցում. «Պետք է վերանայվեն փողոցները, գուցե պետք է լինեն միակողմանի երթևեկությամբ փողոցներ, որտեղ կլինեն նաև կայանատեղիներ: Պետք է ուսումնասիրել ուղևորների հոսքը, ոչ թե միայն տնից տուն գնալու, այլ առավել բանուկ մասերը միմյանց կապելու համակարգ պետք է ստեղծվի»:
Հանրային խորհրդի անդամները նաև կարևորեցին հասարակական սանհանգույցների առկայության հարցը, ինչպես նաև հրավառությունների կանոնակարգման խնդիրը: