ԱՄՆ-ն ընդլայնում է իր ազդեցության ոլորտները նախկին խորհրդային տարածքների հաշվին, և Ուկրաինայի իրավիճակը դրա հաստատումն է՝ հայտարարել է հայտնի ամերիկացի փիլիսոփա և հրապարակախոս Նոամ Խոմսկին Truthout պարբերականին տված հարցազրույցում:
«Բեռլինի պատի անկումից և դրան հաջորդած ԽՍՀՄ փլուզումից անմիջապես հետո ԱՄՆ-ն սկսել է հնարավորություններ փնտրել՝ ընդլայնելու իր ազդեցության ոլորտները՝ նպաստելով ՆԱՏՕ-ի ռազմական բլոկի ընդլայնմանը Խորհրդային Միության ազդեցության տակից դուրս եկած երկրների հաշվին և շրջանցելով Գորբաչովի հետ բանավոր պայմանավորվածությունները: Ակնհայտ է, որ Ուկրաինան հերթական «հասած միրգն» է, որն ԱՄՆ-ը պոկում է ծառից»,- հայտարարել է Խոմսկին:
Փիլիսոփայի կարծիքով՝ Ռուսաստանն ունի բոլոր հիմքերը՝ անհանգստություն արտահայտելու Ուկրաինայի և ՆԱՏՕ-ի հարաբերությունների առնչությամբ:
Խոմսկին խոսել է նաև Մերձավոր Արևելքում հակամարտությունների պատճառների մասին: Նրա կարծիքով՝ Մեծ Բրիտանիան, այնուհետև նաև ԱՄՆ-ը աջակցել են արմատական իսլամիստներին, որպեսզի դիմակայեն աշխարհիկ ազգայնականությանը, որը համարել են ավելի վտանգավոր մրցակից տարածաշրջանում առաջնորդության համար պայքարում: Արդյունքում գոյացել է քաղաքական վակուում, որը լցրել է կրոնական ծայրահեղականությունը, և որին աջակցում է ամենաարմատական իսլամիստական պետությունն աշխարհում՝ Սաուդյան Արաբիան:
«Կարծում եմ, որ ԱՄՆ-ը, այնուամենայնիվ, չի ծրագրել ստեղծել ԴԱԻՇ-ը, սակայն նրա կործանարար գործողությունները Լիբիայում և Սիրիայում, ինչպես նաև պատերազմն Իրաքում վիթխարի կերպով նպաստել են նման մասշտաբային ահաբեկչական կազմակերպության ի հայտ գալուն»,- հավելում է ամերիկացի պրոֆեսորը:
