Մի քանի արաբական ԶԼՄ-ներ, ինչպես նաև սիրիացի ընդդիմադիրները դեկտեմբերի 24-ին հայտարարել են, որ բանակը քիմիական զենք է օգտագործել: Այս մասին գրում է իսրայելական «Հաարեց» թերթը:
Առնվազն երկու աղբյուր հաղորդել է, որ Հոմսի Ալ-Բայդա արվարձանում երկնքից թունավոր նյութով լի երկու բեռնարկղ է նետվել, ինչի հետևանքով շնչահեղձությունից զոհվել է, տարբեր տեղեկություններով, 6-7 մարդ: Արվարձանի շատ բնակիչներ դիմել են հիվանդանոցներ՝ սրտխառնոցի, շնչառական խնդիրների գանգատներով, եղել են նաև դեպքեր, երբ կորցրել են գիտակցությունը: Տուժածների մի մասը գտնվում է ծանր վիճակում:
Համացանցում տեսանյութ է հայտնվել, որի հեղինակները հաստատում են, որ նկարահանել են թունավորվածներից մեկի վերակենդանացման գործընթացը:
Ընդդիմության տվյալներով՝ գազի կիրառման հետևանքով 4 մարդ կուրացել է, ևս 4-ը՝ կաթվածահար եղել: Ակտիվիստները պատմել են, որ չգիտեն` կոնկրետ ի՞նչ գազ է կիրառվել, սակայն բժիշկները ենթադրում են, որ դա զարին է եղել:
Այլ աղբյուրներից տեղեկությունը չի հաստատվել:
Մի քանի շաբաթ առաջ արևմտյան հատուկ ծառայությունները հայտարարել էին, որ սիրիական բանակը սկսել է նախապատրաստվել թունավոր նյութի մարտական կիրառման: Ի պատասխան` պաշտոնական Դամասկոսը հայտարարել էր, որ երբեք չի սեփական բնակչության դեմ քիմիական զենք չի կիրառի:
Ավելի վաղ Սիրիայի կառավարությունը հերքել էր նաև ապստամբների դեմ տանկերի, հրետանու, ավիացիայի և բալիստիկ հրթիռների կիրառումը: