Ֆրանսիայի նախկին առաջին տիկին Կառլա Բրունի-Սարկոզին ծնվել է Իտալիայի Թուրին քաղաքում, 1967 թվականի դեկտեմբերի 23-ին: Նրա մայրը՝ Մարիսա Բորինին, դաշնակահարուհի է, իսկ հայրը՝ Ալբերտո Բրունի-Տեդեսկին՝ արդյունաբերող և կոմպոզիտոր: Երբ Կառլան 5 տարեկան էր, նրա ընտանիքը բնակության նպատակով տեղափոխվում է Ֆրանսիա: Այս մասին հայտնում է RIA Novosti-ն:
Բրունին սովորել է Շվեյցարիայի ինտերնատում, իսկ այն ավարտելուց հետո ընդունվել Փարիզի համալսարանի Արվեստի և ճարտարապետության ֆակուլտետը: 19 տարեկանում նա որոշում է իրեն փորձել մոդելային բիզնեսում:
Առաջին հաջողությունն է դառնում 1988 թվականին Guess-ի գովազդային արշավում նկարահանվելը: Այդ ժամանակ էր նաև, որ նա առաջին անգամ հայտնվեց իսպանական Vogue-ի շապիկին: Առաջին համաձայնագիրը նա կնքել է City models գործակալության հետ:
Մի քանի տարվա ընթացքում նա դարձել է այնպիսի հայտնի ընկերությունների դեմքը, ինչպիսիք են Prada-ն, Christian Dior-ը, Givenchy-ն, Cesare Paciotti-ն, Dolce&Gabbana-ն, Chanel-ը և MaxMara-ն:
1994-95 թթ. Կառլան մասնակցել է Chanel-ի, Christian Dior-ի, Valentino-ի, Yves Saint Laurent –ի և Chloe-ի ցուցադրություններին՝ աշխատելով տարեկան 7.5 մլն դոլար և ճանաչվել է սերնդի ամենաբարձր վարձատրվող մոդելներից մեկը:
1999 թվականին Բրունին հայտնի ֆրանսիացի երգիչ Ժյուլիեն Քլերկին է առաջարկել իր գրած երգերը, որոնք ընդգրկվել են նրա Si j’étais elle ալբոմում:
2003-ին Կառլան թողարկել է իր առաջին ալբոմը Quelqu’un M’a Dit-ն: Այն մեծ ժողովրդականություն ստացավ, Ֆրանսիայում վաճառվեց մոտ 800 հազար օրինակով: Վաճառքի համաշխարհային ցուցանիշը հասնում է 1.2 մլն օրինակի: Ալբոմի թողարկումից հետո նա վերադառնում է մոդելի կարիերային:
Երկրորդ սկավառակը հայտնվել է 2007-ին՝ No Promises: Իր ալբոմներում Բրունին երգում էր ոչ միայն իր հեղինակած, այլև ուրիշ հեղինակների երգեր:
2008 թվականին Կառլան ամուսնացել է Ֆրանսիայի նախագահ Նիկոլա Սարկոզիի հետ և դարձել առաջին տիկին:
Պետության ղեկավարի կին լինելով՝ նա չի թողել իր կարիերան: Միակ սահմանափակումը, որը նրան պարտավորեցրել է կարգավիճակը, եղել է համերգային շրջագայությունից հրաժարվելը:
2008-ին արդեն ֆրանսիայի առաջին տիկինը թողարկել է իր երրորդ ՝ Comme si de rien n’etait ալբոմը: Չորրորդ ալբոմի թողարկումը նախատեսված էր 2011-ի սեպտեմբերին,սակայն 2012-ի ապրիլ-մայիսին կայանալիք նախագահական ընտրությունների պատճառով հետաձգվել է:
Կառլան նկարահանվել է 17 ֆիլմերում, այդ թվում Ալեն Բերբերյանի «Պապարացի» ֆիլմում, Վուդի Ալենի «Կեսգիշերը Փարզիում» ֆանտաստիկ ֆիլմում և այլն:
2012-ի մայիսին ամուսնու պարտութունից հետո նրանք ստիպված եղան լքել Ելիսեյան պալատը, որից հետո Կառլան կրկին շարունակում է մոդելային բիզնեսը:
Նա 2009-ին ստեղծված բարեգործական հիմնադրամի նախագահն է: Հիմնադրամն իրականացնում է ուսանողների և բնակչության սոցիալապես անապահով խմբերի օգնություն:
