Վրաստանի խորհրդարանի 3 մեծամասնական թափուր տեղերի ընտրությունը հնարավոր կլինի անցկացնել 2013-ի ապրիլին: Ընտրական օրենսգրքում միջնաժամկետ ընտրությունների վերաբերյալ համապատասխան փոփոխությունները խորհրդարանը հաստատել է ուրբաթ օրը` երրորդ և վերջնական լսումների ժամանակ: Այս մասին հայտնում է Trend-ը:
Մինչ այդ միջնաժամկետ ընտրություններ հնարավոր էր անցկացնել միայն հոկտեմբերին:
Ընդունված փոփոխությունների համաձայն՝ միջնաժամկետ ընտրություններ կարող են անցկացվել տարեկան երկու անգամ՝ ապրիլին և հոկտեմբերին: Մասնավորապես, եթե խորհրդարանի պատգամավորի լիազորությունները դադարեցվեն փետրվարի 15-ից հուլիսի 15-ը ընկած ժամանակահատվածում, ապա միջնաժամկետ ընտրությունները կանցկացվեն նույն տարվա հոկտեմբերին, հակառակ դեպքում՝ առաջիկա ապրիլին:
Ներկայում խորհրդարանում թափուր են Նաձալադևի, Սամտրեդիայի և Բագդատիի շրջաններից պատգամավորների տեղերը:
Այդ շրջաններում ընտրությունները տեղի կունենան ապրիլին, որից հետո պատգամավորների թիվը կհասնի 150-ի:
Գալիք տարում պետբյուջեն 47.5 մլն լարի է հատկացրել Կենտրոնական ընտրական հանձնաժողովին:
