Ինչպես հայտնի է, Ջորջ Քլունիի և Ամալ Ալամուդինի հարսանիքին ներկա են եղել միայն ամենամտերիմ ընկերներն ու զույգի հարազատները: Հրավիրվածների մեջ են եղել Սինդի Քրոուֆորդը և նրա ամուսինը՝ Ռենդի Գերբերը, Մեթ Դայմոնը կնոջ՝ Լուչիանոյի հետ, Բոնոն, Աննա Վինտուրը, Էմիլի Բլանտը և ուրիշներ, գրում է Spletnik.ru-ն:
Սակայն փեսացուի երկու լավագույն ընկերները՝ Բրեդ Փիթն ու Բեն Աֆլեքը, այդպես էլ չեն հայտնվել տոնակատարությանը, չնայած որ այն երեք օր է շարունակվել:
Ինչպես գրում են արևմտյան ԶԼՄ-ները՝ դերասանները հարսանիքին չեն կարողացել մասնակցել աշխատանքի պատճառով:
«Նրանք երկուսն էլ աշխատում են, այդ պատճառով էլ, երբ հայտնել են Ջորջին, որ հարսանիքին չեն մասնակցի, նա դա որպես վիրավորանք չի ընդունել»,- ասում է Քլունիի շրջապատից աղբյուրը:
Փիթը կնոջ՝ Ջոլիի հետ զբաղված է «Ծովի մոտ» ֆիլմի նկարահանումներին:
«Այդ ֆիլմը Բրեդի և Էնջիի համար շատ կարևոր է, այդ պատճառով էլ նրանք պետք է կենտրոնանան միայն դրա վրա»,- ասել է Քլունին:
Աֆլեքը իր հերթին գտնվել է Նյու Յորքի 52-րդ կինոփառատոնի բացմանը: Նրա մասնակցությամբ Gone Girl ֆիլմը բացել է փառատոնը: