«Առաջին լրատվական»-ի զրուցակիցն է Սյունիքի մարզպետ Սուրիկ Խաչատրյանը:
-Պարոն Խաչատրյան, շաբաթ-կիրակի Սյունիքի մարզում ընդդիմադիր եռյակի հանրահավաքները ուղեկցվեցին մի խումբ երիտասարդների սադրիչ գործողություններով, տեխնիկական խոչընդոտներ եղան: Այդ ամենի կազմակերպիչը դուք եք համարվում: Ինչի՞ համար էին այդ գործողությունները:
-Եթե շատ թե քիչ ինձ ճանաչում եք, ապա պետք է հասկանաք, որ դա ինձ հետ որևէ կապ չունի: Ես ինձ թույլ չէի տա, որ կազմակերպեի, որ որևէ մեկը խոչընդոտ սարքեր:
-Այդ դեպքում ովքե՞ր էին այդ մարդիկ, որ խոչընդոտելու փորձեր էին անում: Բացի դրանից, ձեր վերաբերյալ ելույթների ժամանակ սարքերը խափանվեցին:
-Միկրոֆոնը չի անջատվել, հոսանքը չի անջատվել, այլ իրենց սարքն է փչացել : Կարող եք դրանում 100 տոկոսով վստահ լինել, որ իրենց սարքն է փչացել: Մեր կողմից որևէ արհեստական խոչընդոտ չի եղել հանրահավաքը խանգարելու համար:
-Ընդդիմադիրները ձեր մարզում բավական սուր քննադատության ենթարկեցին ձեզ և ձեր նշանակումը: Ինչպե՞ս եք վերաբերվում դրան և, առհասարակ, եռյակի սկսած հանրահավաքների շարքին, որի վերջնական նպատակը, ըստ հայտարարվածի, իշխանափոխությունն է:
-Դրանք ընդամենը կոչեր են: Ոչ մի փոփոխություն, որևէ լուրջ բան էլ չի լինի: Հավաքի մասնակիցների թիվը հուշեց, թե Սյունիքում ինչպես են վերաբերվում իրենց:
-Բայց իշխանությունները ջանք չէին խնայել մարդկանց հոսքը հանրահավաքին խոչընդոտելու համար: Ճանապարհներն էին փակվել:
-Բա ընդդիմությունը տենց պետք ա պատճառաբանի, ուրիշ ասելու բան չունի: Ինչ ասեն: Երբ մարդիկ իրենց չեն ընդունում, չեն հավաքվում՝ իրենք էլ տենց պետք ա ասեն: Բայց իրենց տարածքային ներկայացուցիչները տեսել են՝ արհեստական խոչընդոտ կա՞, թե՞ չէ: Ես ընդամենը 1 օր է՝ ինչ այստեղ եմ: Մեկ օրում ինչ կարող էի խոչընդոտել:
-Ճանապարհներ էիք փակել, կիրակի օրը աշխատանքային էր դարձվել:
-Չկա տենց բան, բոլոր տրանսպորտը, ճանապարհները բաց են եղել: Էդ Սիսիանի քաղաքապետի հերյուրանքներն են: Էն որ իրան հարգելով՝ ժողովուրդը չի ներկայացել հանրահավաքին, դրա համար ուզում ա իրա մեղքերը փաթաթի ուրիշի վզին: Իսկ կիրակին աշխանքային չի եղել: Քաղաքապետը բացահայտ ստում ա: Ոչ մեկը երկու գլուխ չուներ, որ կիրակին աշխատանքային օր հայտարարեր:
-Իսկ դուք ինչո՞ւ էիք գնացել աշխատանքի կիրակի օրով:
-Վերջացրեք ձեր հարցերը: Ես զբաղված եմ:
-Պարոն Խաչատրյան, այսօր ԱԺ-ում ընդդիմադիր պատգամավոր Նիկոլ Փաշինյանը, հարց ուղղելով ԱԺ նախագահին, կրկին վերահաստատել է, որ անցած տարի ձեր տան բակում հենց դուք եք սպանել Ավետիք Բուդաղյանին:
-Չեմ կարծում, որ Փաշինյան Նիկոլի կարծիքն ինձ համար այդքան կարևոր ա, կամ ես դրա կարիքն ունեմ: Անցած տարվա դեպքերի համար կան իրավապահ մարմիններ, որոնք էլ որոշում են, թե ով է մեղավոր, ով չի մեղավոր:
-Այո, Փաշինյանը նշեց նաև, որ սպանությունը կոծկվել է գլխավոր դատախազ Գևորգ Կոստանյանի կողմից և ամենաբարձր մակարդակով:
-Ես Փաշինյանից այլ բան չեմ էլ սպասում:
-Միայն այդպե՞ս եք արձագանքում պատգամավորի հնչեցրած տեսակետին:
-Վերջացրեք, ես ժամանակ չունեմ:
Լուսանկարը՝ armtimes.com-ի