«Ժամանակ» օրաթերթի գլխավոր խմբագիր Արման Բաբաջանյանն այսօրվա ասուլիսում հայտարարեց, որ նախագահական նստավայրից հատուկ հրահանգ է իջեցվել քիչ թե շատ անկախ թերթերի դեմ հայցադիմումներ ներկայացնել՝ որպես փոխհատուցում պահանջելով մեծ գումարներ:
Պարոն Բաբաջանյանն այսպես մեկնաբանեց Քաղաքացիական օրենսգրքում կատարված փոփոխությունների արդյունքում վերջին շրջանում տարբեր թերթերի դեմ ներկայացված հայցադիմումները:
«Թերթերն այժմ են զգում, թե ինչ է նշանակում այդ օրենքի ապաքրեականացումը: Նմանատիպ դեպքերը շարունակվելու և շատանալու են: Ես ունեմ տեղեկություն, որի համաձայն` կա նախագահականից իջեցված հրաման, որպեսզի փակվեն բոլոր թերթերը»,- ասաց Բաբաջանյանը:
Ավելին, ըստ նրա, ընտրություններից առաջ նման հայցադիմումները շատանալու են՝ նպատակ հետապնդելով, ֆինանսական ծանր դրության մեջ դնելով, ընտրությունների նախաշեմին փակել մի շարք թերթեր: