Ադրբեջանական apa.az լրատվական կայքի հաղորդմամբ, Միջազգային ճգնաժամային խումբն (ՄՃԽ) իր տարեկան զեկույցում նշել է, որ, չնայած գնալով աճում է ղարաբաղյան հիմնախնդրի հանդեպ միջազգային հանրության, ինչպես նաև ՌԴ նախագահ Դմիտրի Մեդվեդևի անձնական ուշադրությունը, այնուամենայնիվ, խնդրի կարգավորման հեռանկարները մեծ չեն թվում.
«Նախորդ տարվա դեկտեմբերին Աստանայում կայացած ԵԱՀԿ գագաթնաժողովի շրջանակներում բազային սկզբունքների շուրջ համաձայնագիր չկնքելու փաստը մեծ մտահոգություննների տեղիք տվեց: Այս քաղաքական փակուղու արդյունքում ամռանն ու աշնանն ավելացավ հայ-ադրբեջանական շփման գծում բախումների ու բռնությունների թիվը»:
ՄՃԽ-ի զեկույցում նաև նշվել են այս տարվա կարևոր հակամարտությունները, որոնց թվում հայտնվել է նաև ղարաբաղյան հիմնախնդիրը, ինչպես նաև կիպրական խնդիրը:
Նշվում է, որ այս տարի ՄՃԽ-ն պատրաստելու է ղարաբաղյան հիմնախնդրին առնչվող 3 զեկույց: Դրանցից առաջինը վերաբերելու է շփման գծում գրանցված բախումներին ու զինադադարի խախտման դեպքերին: Երկրորդ զեկույցում ՄՃԽ-ն պլանավորում է շարադրել լարվածության թուլացմանն ու բանակցային գործընթացում առաջխաղացմանը միտված ուղիները:
Եվ վերջապես, երրորդ զեկույցը նվիրված է լինելու Լեռնային Ղարաբաղից հարկադրաբար հեռացածներին, նրանց քաղաքական, տնտեսական ու սոցիալական կենսապայմաններին: