Գերմանիայի Դարմշտադտ քաղաքի բնակչուհին երեք շաբաթ չի կարողացել հեռանալ իր կպչուն «երկրպագուից»: Վերջինս սովորական աղավնի է, որի մոտ արտասովոր հետաքրքրություն է առաջացել այդ կնոջ նկատմամբ: Այս մասին հայտնում է The Local-ը:
Տնային տնտեսուհու խոսքով՝ փետրավոր դոնժուանը ոչ մի վայրկյան չի հեռացել իր տան մոտից: Ավելին` թռչունն ամբողջ ժամանակ ներս մտնելու հնարավորություն է փնտրել` տիկնոջ հետ շփվելու համար: Գերմանուհին չի պատասխանել սիրահար թռչնի սիրուն և նրան «տարօրինակ» է անվանել: Նա կասկածել է, որ թռչունն իր հետ ձգտել է «ընտանեկան հարաբերությունների»:
Թռչնին փորձել են տան մոտից հեռացնել բոլոր հնարավոր միջոցներով՝ ցուցաբերելով քնքուշ վերաբերմունք, իսկ հետո նաև կրակելով ջրային ատրճանակից:
Վերջիվերջո` գերմանուհին ստիպված է եղել մոլագարի մասին հայտնել ոստիկանությանը: Նրանք կնոջը խորհուրդ են տվել թռչնին տեղափոխել անասնաբույժի մոտ:
Կինը, սակայն, նրանց խորհուրդներին չի հետևել և ինքնուրույն է թռչնին վտարել: Թե ինչպես է դա նրան հաջողվել, և թռչունը կրկին վերադարձել է, թե ոչ` չի հաղորդվում:
