Այսօր տեղի ունեցավ կլոր սեղան՝ ‹Քաղաքացիություն չունեցող անձանց բացահայտում և պաշտպանություն. ապաքաղաքացիության կարգավիճակի որոշման ընթացակարգերի ներկայացում›› խորագրով, որին ներկա էին իրավաբաններ, ՀԿ-ների, ՀՀ ոստիկանության ներկայացուցիչներ և այլք:
Իրավաբան Աշխեն Եսայանն «Առաջին լրատվական»-ի հետ զրույցում անդրադառնալով քաղաքացիություն ձեռք բերելու հետ կապված խնդիրներին՝ նշեց, որ կան անձինք, որ ազգությամբ հայ չեն, սակայն Սիրիայի դեպքերից հետո եկել են Հայաստան և ցանկանում են դառնալ ՀՀ քաղաքացի: Նրա խոսքով՝ սակայն ոչ բոլորին է հաջողվում դառնալ ՀՀ քաղաքացի, քանի որ չեն համապատասխանում օրենքով սահմանված պայմաններին:
«Կան որոշակի պայմաններ, որ անհրաժեշտ են ՀՀ քաղաքացի դառնալու համար. նախ՝ տիրապետել հայոց լեզվին, որոշ չափով իմանալ ՀՀ Սահմանադրությունը: Բացի այդ՝ անհրաժեշտ է լինում ԱԱԾ-ի հավանությունը, թե արդյոք նրանք անվտա՞նգ են Հայաստանի համար: Եթե բոլոր պայմանները համապատասխանում են, որքանով ես գիտեմ՝ վիզաների վարչությունը չի մերժում»,- ասաց նա՝ հավելելով, որ ավելի հաճախ ժամանակավոր կացության են ձգտում, ոչ թե քաղաքացիության: Շատ դեպքերում մարդիկ չեն հրաժարվում իրենց երկրի քաղաքացիությունից;
Աշխեն Եսայանի խոսքով՝ հիմնականում Հայաստան են գալիս տեղի իրադարձությունների պատճառով, մեծ մասամբ՝ Իրաքից և Սիրիայից: Եվրոպական երկրներից շատ քիչ են գալիս և բացառիկ դեպքերում: Ամուսնանալով ՀՀ քաղաքացու հետ՝ այստեղ են բնակվում, իրենց աշխատանքն այստեղ է, իրենց պետք է քաղաքացիություն:
Աշխեն Եսայանն անդրադարձավ նաև այն խնդրին, երբ այստեղ քաղաքացիությունից հրաժարվում են և ՌԴ-ում դառնում քաղաքացի:
Նա նշեց, որ նախ՝ Հայաստանի քաղաքացիությունից են հրաժարվում, որպեսզի ՌԴ-ում քաղաքացիություն ձեռք բերեն, և երբ հասնում են կենսաթոշակային տարիքի, թոշակավորվում են, սակայն սա ոչ միշտ է հաջողվում ՀՀ քաղաքացիներին:
Ամբողջ խնդիրը, ըստ նրա, այն է, որ Հայաստանում նորից կարող են վերականգնել իրենց քաղաքացիությունը, պարզապես ՌԴ-ն չի ճանաչում մեր քաղաքացիներին, ճանաչում է միայն իրենց քաղաքացիներին:
Ավելին՝ տեսանյութում:
