Իսրայելը հաստատել է Արևմտյան ափին 500-ից ավելի տներ կառուցելու ծրագիրը, որը նոր քաղաքի հիմքը կլինի։ Այս մասին հայտարարել է այդ տարածքի՝ Գուշ-Էցիոնի շրջանային խորհրդի նախագահը։
Խորհրդի նախագահ Դավիդ Պերելի խոսքերով՝ երկրի ՊՆ-ն հաստատել է 523 տուն կառուցելու որոշումը։ Դեռ 2000 թվականին խորհուրդն առաջարկել էր Գուշ-Էցիոնում քաղաք հիմնել՝ ամենաքիչը 6000 տներով՝ 25 000 բնակչի համար։
Jerusalem Post-ը գրում է, որ դա կլինի Իսրայելի հինգերորդ քաղաքը Արևմտյան ափին։ Քաղաքը կստանա ներկայիս այդ տարածի բնակավայրի անվանումը՝ Գևաոտ։
Իսրայելի իշխանությունները թույլատրել են Երուսաղեմում, Սամարայում և Հուդայում 3000 բանակելի տների շինարարություն իրականացնել։ Որոշվել է նաև 1000 տուն կառուցել Երուսաղեմի հրեական թաղամասում և Արևմտյան ափին։ Իսրայելի իշխանությունները հայտարարում են, որ այս շինարարական աշխատանքները նախատեսված են երկրի ռազմավարական քարտեզին համապատասխան, որը բխում է հրեական պետության շահերից։
Իսրայելը քաղաքաշինության այս ծրագիրը կատարում է ի պատասխան ՄԱԿ-ի կողմից Պաղեստինին դիտորդ պետություն ճանաչելու։ Նոյեմբերի 29-ին 193 ձայներից 138 կողմով որոշվել է Պաղեստինին տալ դիտորդ-պետության կարգավիճակ։ Իսրայելը տներ է կառուցում այն վայրերում, որոնք Պաղեստինը համարում է իր տարածքները։ Իսրայելի այս քայլը դատապարտում են ԵՄ-ի երկրները և ԱՄՆ-ը։
