«Առաջին լրատվական»-ի զրուցակիցն է ՀԱԿ խմբակցության քարտուղար Արամ Մանուկյանը:
– Պարոն Մանուկյան, այսօր Աբովյան քաղաքում ոչ իշխանական եռյակի ուժերով՝ ՀԱԿ, «Բարգավաճ Հայաստան» և «Ժառանգություն» կուսակցություններով հանրահավաք եք նախատեսել: Ունե՞ք տեղեկություններ կամ մտահոգություն, որ իշխանությունները կամ ոստիկանությունը խոչընդոտելու են այն:
– Այս պահին չկա այդպիսի բան, չեմ կարծում, որ լինի: Լավատես լինենք, և կարծում եմ, որ հանրահավաքը նորմալ կանցնի:
– Ինչպե՞ս եք մեկնաբանում Դաշնակցություն կուսակցության Բյուրոյի ներկայացուցիչ Հրանտ Մարգարյանի անցած շաբաթ հեռուստաընկերություններից մեկին տված հարցազրույցի այն հայտարարությունը, թե նրանք, այսինքն` եռյակի ուժերը, չեն ուզում, որ լավ բան լինի, երբ հանկարծ իշխանությունները ընդունեն սահմանադրական փոփոխությունների իրենց փաթեթը:
– Պատասխանը զուտ քաղաքական է, անձնական տեսակետս լրիվ թողնում եմ մի կողմ. մենք խորհրդարանում դեռ Դաշնակցության հետ աշխատելու ենք, համատեղ գործունեություն ենք ծավալելու: Եվ իմ քաղաքական դիրքորոշումը հետևյալն է՝ այս պահին ՀՅԴ-ի նկատմամբ որևէ բացասական բան ասելու ցանկություն չունեմ, քանի որ ունենք ծրագրեր, համատեղ աշխատանք, և դա ինձ համար շատ ավելի կարևոր է:
– ՀՅԴ-ն երեկ ներկա չէր եռյակի նիստին: Կարելի՞ է ասել, որ նրանք արդեն հեռանում են քառյակից:
– Ո՛չ, նրանք հեռանալու մասին չեն հայտարարել: 12 կետերի ամփոփումը մենք անելու ենք քառյակով: Եվ եթե իրենք համաձայն լինեն, կարծեմ թե համաձայն են, հավաքին 12 կետերի կատարողականը կներկայացվի չորս ուժերի կողմից:
– Հ. Մարգարյանը նաև հայտարարել էր, թե երեք ուժերը չեն պահանջում վարչապետի հրաժարականը, այդ պատճառով էլ քննադատության թիրախ են ընտրել սահմանադրական փոփոխությունները:
– Ճշմարիտ չէ, դեռ մենք չգիտենք, թե ինչ ենք հայտարարելու, ինքը որտեղից գիտի, թե ինչ ենք հայտարարելու: Մենք դեռ չենք որոշել հոկտեմբերի 10-ին ժողովրդին ասելիք մեր մեսիջը, և եթե մենք դա դեռ չգիտենք, դժվար թե նա իմանար:
– Հոկտեմբերի 10-ի հանրահավաքի ժամանակ իշխանափոխության պահանջ լինելո՞ւ է:
– Համբերեք, մի շտապեք:
– Իսկ շուրջօրյա հանրահավաքներ լինելո՞ւ են:
– Սովորաբար մենք միտինգի վերջում հրապարակում ենք միտինգի և հաջորդ օրվա ծրագրերը: Պատկերացնում եք, միտինգից 20 օր առաջ ես հրապարակեմ միտինգի ավարտի մասին: Եթե անգամ իմանամ՝ չեմ ասի: Բայց այս պահին հաստատ չգիտեմ: