Մարտի 27-ին Հյուսիսատլանտյան դաշինքը ստանձնեց Լիբիայում միջազգային ուժերի հրամանտարությունը: ՆԱՏՕ-ի իրավասությունների մեջ են մտնելու Լիբիայի փակ օդային տարածքի անվտանգության ապահովումը, օդային ռմբակոծությունների իրականացումը և Լիբիայի ծովային սահմանների հսկումը: Այս մասին հաղոդում է Associated Press գործակալությունը:
ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել է, որ ՆԱՏՕ-ն գործելու է ՄԱԿ-ի Անվտանգության խորհրդի թիվ 1973 բանաձևի պահանջներին համաձայն, ինչը թույլ է տալիս «բոլոր միջոցները ձեռք առնել» Լիբիայի խաղաղ բնակչության անվտանգությունն ապահովելու համար: Սա կարող է նշանակել, որ ՆԱՏՕ-ն մոտ ժամանակներս, բացի օդային ռմբակոծություններից, կարող է իրականացնել նաև ցամաքային գործողություններ, իսկ ՄԱԿ-ի բանաձևը դա թույլ է տալիս:
Մինչդեռ France 24-ը փոխանցում է ՆԱՏՕ-ի անդամ երկրներից մեկի դիվանագետի խոսքերը, որը հայտարարել էր, որ ՆԱՏՕ-ի ծրագրերի մեջ չի մտնում միջամտությունը ապստամբներին աջակցելու նպատակով: «ՆԱՏՕ-ն միշտ պետք է մնա չեզոք, և որևէ կողմին չպաշտպանի»,- ասել էր դիվանագետը:
Ավելի վաղ մենք տեղեկացրել էինք, որ եկար և դժվար բանակցություններից հետո ՆԱՏՕ-ի 28 անդամ երկրները համաձայնել էին ստանձնել հրամանատարությունը Լիբիայի դեմ գործողություններում: ՆԱՏՕ-ի գործողությունները կղեկավարի կանադացի գեներալ Շարլ Բուշարը: