ՄԱԿ-ի գլխավոր քարտուղար Պան Գի Մունը Իսրայելին կրկին կոչ է արել հրաժարվել օկուպացված պաղեստինյան տարածքներում բնակավայրեր կառուցելուց` նշելով, որ այդ քայլը կարող է «մահացու հարված» հասցնել մերձավորարևելյան կարգավորմանը` հայտնում է ITAR-TASS-ը:
«Սա միջազգային իրավունքի և մերձավորարևելյան «քառյակի» առաջարկների ակնհայտ խախտում է: Այն խոչընդոտ կդառնա մերձավորարևելյան կարգավորման ճանապարհին»,- հայտարարել է նա այսօր ՄԱԿ-ի շտաբ-բնակարանում տեղի ունեցած մամլո ասուլիսի ժամանակ: Նրա խոսքով` ներկայիս բարդ պայմաններում կողմերը «պետք է խուսափեն հրահրող գործողություններից, որոնք կարող են քայքայել առանց այն էլ փխրուն մերձավորարևելյան գործընթացը»:
Իսրայելին և պաղեստինցիներին առավելագույն զսպվածություն հանդես բերելու կոչ է արել նաև ՄԱԿ-ում ՌԴ մշտական ներկայացուցիչ Վիտալի Չուրկինը: Նրա խոսքով` բնակավայրերի շինարարությունը վերսկսելու Իսրայելի իշխանությունների որոշումը բացասաբար կանդրադառնա ոչ միայն երկկողմ հարաբերությունների վրա, այլև «հարցականի տակ կդնի երկպետական կարգավորման բանաձևի իրագործումը»:
Նա հայտարարել է, որ «Մոսկվան կշարունակի էներգետիկ կերպով նպաստել» պաղեստինցիների և իսրայելցիների միջև կայուն և երկարատև կարգավորմանը ինչպես երկկողմ ուղիներով, այնպես էլ բազմակողմ ձևաչափերով, նաև` միջազգային հաշտարարների մերձավորարևելյան «քառյակում»:
Դեկտեմբերի 17-ին Իսրայելը հայտարարել էր Արևելյան Երուսաղեմում 1500 նոր բնակարան կառուցելու իր մտադրության մասին: Ավելի վաղ իսրայելական կողմը հայտարարել էր բնակեցման գործունեությունը ակտիվացնելու իր մտադրության մասին ինչպես Հորդանան գետի արևմտյան ափին, այնպես էլ Արևելյան Երուսաղեմում, նաև ռազմավարական առումով կարևոր` Հորդանան գետի Արևմտյան ափի հյուսիսային և հարավային հատվածները միացնող «Е1 գոտում»:
Իսրայելի քայլը պատասխանն է Պաղեստինի ազգային վարչակազմի (ՊԱՎ) գործողությունների, որը նոյեմբերի 29-ին հասել է ՄԱԿ-ում դիտորդ-պետության կարգավիճակի: Սա Պաղեստինին Իսրայելի կողմից օկուպացված տարածքները վերադարձնելու պահանջով Հաագայի միջազգային քրեական դատարան դիմելու հնարավորություն է տալիս:
