«Առաջին լրատվականը» զրուցել է Հայաստան այցելած պարսիկների հետ: Ձեզ ենք ներկայացնում նրանց խոսքը` առանց մեկնաբանության:
– Ես առաջին անգամ եմ գտնվում Հայաստանում: Հայաստանը շատ գեղեցիկ երկիր է, ու եթե առիթ ունենամ կրկին կայցելեմ Հայաստան:
Սահմանի վրա խցանումների պատճառով սահմանապահները մեր հանդեպ հարգալից չէին, բայց արդեն Երևանում ամեն ինչ դրական էր:
Մեզ համար հիմնական խնդիրը տրանսպորտն է, տաքսիները հավելյալ գումար են պահանջում զբոսաշրջիկներից:
***
– Ես մի քանի անգամ այցելել եմ Հայաստան, ու պիտի ասեմ, որ նախորդ տարիների համեմատ, շատ ավելի են լավացել թե՛ քաղաքը, թե՛ ծառայությունները:
Հիմնականում Հայաստանում կազմակերպված համերգներն են, որ ինձ քաջալերել են այցելել Երևան:
Հայաստանը շատ հանգիստ երկիր է, և դա ինձ դուր է գալիս:
***
– Մենք առաջին անգամ ենք լինում Հայաստանում:
Հայաստանում շատ քչերն են, որ այլ լեզուների են տիրապետում, ասենք` անգլերենի, և այդ պատճառով մենք դժվարանում ենք իրենց հետ հաղորդակցվել:
Սահմանին ահավոր վիճակ էր` մեզ մոտ 10 ժամ պահեցին:
Հայ սահմանապահները վիրավորում էին, անգամ փորձում էին կաշառք ստանալով մեզ ավելի շուտ բաց թողնել:
Մեզ ինչպես կենդանիների էին վերաբերվում, համերգների ընթացքում մուտքի կնիքը փակցնում էին մեր ձեռքի վրա, ինչպես կհամարակալեն ոչխարներին, դա արհամարհական էր մեզ համար:
– Մենք միայն համերգների համար ենք եկել Հայաստան, բայց մեր ամբողջ խումբը հայտնում է, որ հաջորդ անգամ այլևս չի գա Հայաստան: Մենք կնախընտրենք համերգների մասնակցել Դուբայում և Թուրքիայում, բայց ոչ Հայաստանում:
Որովհետև Իրանն ու Հայաստանը բարեկամ երկրներ են, մենք պատկերացնում էինք, որ այստեղ մենք մեզ լավ կզգանք, բայց հակառակը ստացվեց:
Օրինակ` տրանսպորտի վարորդները մի կարճ ճանապարհն այնքան էին երկարացնում, որ ավելի գումար ստանան մեզնից:
Հայաստանը սխալ է վարվում. եթե մի երկրի համար կարևոր է զբոսաշրջությունը, ուրեմն պիտի լուրջ ուշադրություն դարձնի այդ ոլորտին:
***
– Իմ տղան Հայաստանում էր բնակվում, բայց չհավանեց ու վերադարձավ, հիմա մենք էլ առաջին անգամ ենք եկել Հայաստան և շատ դժգոհ ենք, որովհետև այնպիսի տպավորություն է, թե հայաստանցիները չեն սիրում իրանցիներին, մեզ հետ հարգալից չեն:
Մենք ի վերջո հյուր ենք եկել, բայց այնպես են մոտենում, որ մենք մեզ շատ վատ ենք զգում:
Այնպես են վարվում, որ մարդ մյուս անգամ չտրամադրվի գալ Հայաստան:
Սահմանի վրա ծառայությունն ահավոր էր, գոնե սահմանին պիտի ավելի հեշտացնեն երթևեկությունը:
Ես այդ իրավիճակը Հայաստանի սխալը չեմ համարում, եթե Հայաստանում Իրանի դեսպանատունը նման հարցերի շուրջ ավելի ուշադիր լիներ, այդօրինակ հարցեր չէին լինի:
Եթե մեկը Իրան է այցելում, մենք նրան մեր տներում ենք հյուրընկալում, բայց այստեղ մի գիշերվա համար մեզնից 400 դոլար են պահանջում: Դա ճի՞շտ է:
Մենք ավելի ազատ լինելու համար է, որ գալիս ենք Հայաստան, բայց տեսնում ենք` դա այլևս այնքան էլ գրավիչ չէ:
Յուրաքանչյուր երկրի համար տուրիզմը շատ կարևոր է, եթե այդ ոլորտը զարգացած չլինի, ուրեմն այլևս պիտի մոռանալ տուրիզմն ու այդ ոլորտից եկած եկամուտները:
