Հայաստանն ու Իրանը ակտիվորեն բանակցում են տարբեր հարցերի, այդ թվում իրանական գազը ՀՀ առաքելու շուրջ: Այսօր այս մասին լրագրողների հետ ճեպազրույցում հայտարարեց Հայաստանում Իրանի Իսլամական Հանրապետության արտակարգ և լիազոր դեսպան Մոհամմադ Ռեիսին՝ խոսելով Հայաստան իրանական էներգակիրների առաքման և Հայաստանի տարածքով իրանական գազը դեպի Արևմուտք տարանցելու հնարավորության շուրջ:
«Առաջին լրատվական»-ի հարցին՝ արդյոք ՀՀ կառավարությունից ստացե՞լ է որևէ արձագանք իր այն բազմաթիվ հորդորներին, թե պետք է համապատասխան ենթակառուցվածք Հայաստանի տարածքով դեպի Արևմուտք իրանական գազի տարանցումն իրականացնելու համար և ՀՀ կառավարության նախաձեռնությունը՝ իրանական գազը ՀՀ առաքելու համար, պատասխանեց, որ շատ ծրագրեր կան այս հարցերի կապակցությամբ: Նրա փոխանցմամբ՝ հայ-իրանական միջկառավարական հանձնաժողովն աշխատում է այս հարցերի ուղղությամբ:
«Տարբեր բնագավառներում համագործակցությունը խորացնելու համար բանակցություններ են ընթանում այդ հանձնաժողովում»,- ասաց դեսպանը՝ ակնարկելով, որ մոտ ապագայում այս հարցի առնչությամբ գուցե նորություն լինի:
Դեսպանը խոսեց նաև Իրանի նախագահի այցից Հայաստան: Նա ասաց, որ այցն անպայման կայանալու է, սակայն, ըստ նրա, հստակ ժամկետը դեռ պարզ չէ: «Համենայն դեպս, դուք գիտեք, որ նախագահների այցելության համար պետք են հատուկ ծրագրեր և ծրագրերի մշակում: Այդ ժամկետը երբ հստակեցվի, մենք տեղյակ կպահենք: Սովորաբար այս այցերը կատարվում են երկկողմ»,- ասաց նա:
Անդրադառնալով Հարավային կովկասում և Մերձավոր Արևելքում «Իսլամական պետություն» ահաբեկչական կազմակերպության հարուցած սպառնալիքներից և այդ սպառնալիքներին հակազդելու Իրանի պատրաստակամության մասին՝ դեսպանն ասաց, որ այդ ահաբեկչական խմբավորումը որևէ առնչություն չունի իսլամի հետ, ուստի նրանց անվանումը՝ «Իսլամական պետություն», սխալ է ընտրված, քանի որ ԻՊ-ն բացառապես ահաբեկչական խմբավորում է, որը «Ալ-Քաիդա»-ից վերածվելով ԻՊ-ի՝ կարողացավ մի շարք հաջողություններ գրանցել իր համար: Ըստ նրա՝ հիմա աշխարհը փորձում է հեռացնել ԻՊ-ի վտանգը այն դեպքում, երբ Իրանն այդ մասին վաղուց էր խոսում, և այդ ամենը արհամարհվում էր: «Իրանը սկզբից դեմ էր, որպեսզի նման խմբավորում գոյություն ունենա: Դժբախտաբար, ուշադրություն չդարձրին, և այս խմբավորումը՝ 20-30 հազար հոգանոց, արդեն ստեղծվեց, և ահաբեկչությամբ, սպառնալիքներով կարողացան առաջ գնալ և, Իսլամական մեծ առաջնորդներից մեկի խոսքով, նրանց դեմը որոշ չափով արդեն առել են: Դուք գիտեք, որ ռմբակոծելով ավելի քան 3000 մետր բարձրությունից՝ որևէ արդյունք չի ստացվում»,- ասաց դեսպանը:
«Առաջին լրատվական»-ի հարցին, թե ի՞նչ է պատրաստ անել Իրանը՝ հեռացնելու ԻՊ-ի սպառնալիքը տարածաշրջանից, դեսպանը պատասխանեց, որ, Իրաքի դիմումի համաձայն, խորհրդակցական ծառայություններ է մատուցում Իրաքին, քանի որ Իրանը մեծ փորձ ունի այս բնագավառում: «Իրանի հեղափոխությունից առաջ Իրանն ահաբեկչության դեմ էր կանգնել, Իրանի շատ ակնառու դեմքեր այլ ահաբեկչական խմբավորումների կողմից նահատակվել են: Իրանն իր պատրաստակամությունն է հայտնել՝ Իրաքին խորհրդատվական ծառայություններ մատուցել այս վտանգը տարածաշրջանից հեռացնելու համար»,- ասաց դեսպանը: