Fitch միջազգային վարկանշային գործակալության տեղեկատվության մեջ ասվում է, որ եվրոգոտում երկարատև ճգնաժամը և ԱՄՆ բյուջեի ճեղքվածքը բացասաբար են ազդում վարկունակության վրա, որը համաշխարհային տնտեսության հիմքն է:
Fitch-ի տվյալների համաձայն՝ AAA տնտեսական բարձր վարկանիշ ունեցող պետությունները, ինչպիսիք են ԱՄՆ-ը, Մեծ Բրիտանիան և Ֆրանսիան, ունեն բացասական ցուցանիշ: Սա վկայում է այն մասին, որ նշված պետությունները վարկունակության խնդիրներ ունեն։
Եվրոգոտու երկարաժամկետ ճգնաժամն առավել հանգիստ փուլ մտավ այն բանից հետո, երբ Եվրոպական կենտրոնական բանկը պարտատոմսերի գնման պատրաստակամություն հայտնեց, ինչը հնարավորություն է տալիս եվրոպական երկրներին կատարել ցավագին, բայց անհրաժեշտ բարեփոխումներ:
Որպես դրական միտում նշվում է եվրոպական երկրների կողմից Հունաստանին տրամադրվող օգնությունը, ինչը կօգնի Հունաստանի` եվրոգոտուց դուրս չգալուն և պաշտպանում է այն տեսակետը, որ եվրոգոտին կարող է խուսափել փլուզումից:
Եթե բյուջետային ճեղքվածքի շուրջ բանակցությունները և ԱՄՆ պետական պարտքի նշաձողի բարձրացման հարցը ձգձգվի մինչև 2013 թ., դա բացասաբար կազդի տնտեսության և ֆինանսական կայունության վրա, և Fitch-ը կարող է վերանայել ԱՄՆ վարկանիշը` իջեցնելով այն:
Համաշխարհային տնտեսության համար այլ ռիսկերի թվում նշվում է նաև եվրոգոտում և Ճապոնիայում տնտեսական անկումը, ինչպես նաև 2012 թ. 3-րդ եռամսյակում Բրազիլիայում և Հնդկաստանում աճի տեմպերի թուլացումը:
Fitch-ի գնահատականներով՝ Չինաստանը, Հնդկաստանն ու Բրազիլիան 2013 թ. տնտեսական աճ կապահովեն: ՀՆԱ-ի ցուցանիշն այս երկրներում կկազմի համապատասխանաբար՝ 8 %, 7 % և 4 %:
