Գալիք տարի ՀՀ-ն պետք է որոշի հարաբերությունների մակարդակը ԵՄ-ի և Եվրասիական միության հետ: Այսօր լրագրողների հետ հանդիպման ժամանակ այս մասին ասաց ՀՅԴ Բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանը՝ խոսելով Ցեղասպանության 100-ամյակին ընդառաջ հայ-թուրքական հարաբերությունների և 2013-ի արտաքին քաղաքական մարտահրավերների շուրջ:
Ըստ բանախոսի՝ հաշվի առնելով հայ-թուրքական հարաբերությունների ներկայիս փուլը, այն վերաբերմունքը, որը Թուրքիան է ցուցաբերում, հայ-թուրքական հարաբերություններում փոփոխություններ ակնկալելու հիմք չկա: Սակայն, Կիրո Մանոյանի կարծիքվ, հավանականությունը մեծ է, որ Թուրքիան քայլեր կձեռնարկի՝ ցույց տալու համար, որ հայ-թուրքական բանակցություններ գնում են: Նրա խոսքով՝ այս քաղաքականությունն ավելի կաշխուժացնեն 2015 թ. նախօրեին՝ մտահոգություն ունենալով, որ ցեղասպանության խնդիրն աշխարհում կարող է շատ մեծ արձագանք ստանալ:
«Հիմա փորձում են ցույց տալ, թե գործընթաց կա, որն իրականում չկա: Հայ-թուրքական արձանագրությունները Թուրքիային հնարավորություն են տալիս օգտագործել այդ փաստը՝ ասելու համար, թե գործընթացի մեջ են, սակայն Հայաստանը դրա դիմաց ոչինչ չի ստանում: ՀՀ-ն ստորագրությունը ետ պետք է վերցնի: Թուրքիայի կողմից դրանք չվավերացնելը ևս մեկ պատճառ է, որ Հայաստանը դրանցից դուրս գա»,- ասաց Կիրո Մանոյանը:
Անդրադառնալով հայ-թուրքական հարաբերությունների վերաբերյալ ՀՀ իշխանությունների մոտեցումներին՝ նա նկատեց, որ այս հարցում գործող իշխանությունների կեցվածքը 2009 թվից ի վեր փոփոխության չի ենթարկվել: «Նախագահը կրկնել է, որ արձանագրությունների ճիշտ լինելում համոզված է և դրանից դուրս գալու նպատակ չունի: Այս նախագահի օրոք հնչել է ՀՀ-ի կողմից մեկ նորություն՝ Ցեղասպանության հետևանքների վերացման հասկացողությունը՝ հատուցման հարցը, բայց դա շատ կարճ տևեց, ինչը տպավորություն է թողնում, որ դա տակտիկական քայլ էր, ոչ թե այս իշխանության ռազմավարությունը:
Արդեն բավարար թվով պետություններ և միջազգային կազմակերպություններ ճանաչել ու դատապարտել են Ցեղասպանությունը, ուստի պետք է ազգովի նույն կեցվածքը դրսևորենք հատուցման հարցում, որը ճանաչման հետ կապված չէ: Ամենակարևորը սրա խոչընդոտն է՝ արձանագրությունները, որոնցից դուրս գալ է պետք»,- մեկնաբանեց ՀՅԴ ներկայացուցիչը:
Տարին ամփոփելով հայ-թուրքական հարաբերությունների տեսանկյունից՝ Կիրո Մանոյանն ասաց, որ այս տարի չեն եղել հարաբերություններ, Թուրքիայի կողմից եղել են փորձեր՝ ցույց տալու, թե ՀՀ-ի հետ ինչ-որ գործընթաց կա: «Թուրքիան դեռ կփորձի երկխոսություն սկսել սփյուռքի որոշ կազմակերպությունների հետ, այնպիսինների, որոնք աղերս չունեն այս խնդիրների հետ և փորձ էլ չեն ունեցել: Թուրքիան դա կփորձի ցույց տալ՝ որպես երկխոսության ճիգ, այնինչ մենք Թուրքիայի նույն կոշտ կեցվածքի շարունակությանն ականատես եղանք՝ ՀՀ-ի հետ հարաբերությունները պայմանավորել Ղարաբաղի հարցով:
Մեր առաջարկն է սեղանին դնել նախագիծ երեք պարբերությամբ՝ հայ-թուրքկան դիվանագիտական հարաբերություններ, ճանապարհների բացում և հարցերի լուծում միջազգային իրավունքին համապատասխան»,- տեսակետ հայտնեց նա:
Ըստ Կիրո Մանոյանի՝ հաջորդ տարի արտաքին քաղաքական խնդիրներից մեկը կլինի Եվրասիական միության և ԵՄ-ի հետ հարաբերությունների որոշակիացումը, Հայաստանը պետք է որոշի իր հարաբերությունների մակարդակը: Նրա համոզմամբ՝ այս խնդիրները որոշելիս առաջնահերթ պետք է լինի ՀՀ անկախության և անվտանգության պահպանությունը:
