Տեղեկատվական տեխնոլոգիաների ոլորտի երկու ներկայացուցիչներ՝ Apple ընկերության գլխավոր տնօրեն Թիմ Կուկն ու Yahoo ընկերության ղեկավար Մարիսա Մայերը ընդգրկվել են հեղինակավոր Time ամսագրի վարկածով «Տարվա մարդու» տիտղոսի հավակնորդների համառոտ ցուցակում: Այս մասին հայտնում է RIA Novosti-ն:
Time-ի խմբագրությունը երեքշաբթի հրապարակել է 8 թեկնածուների համառոտ ցուցակը: Անցած շաբաթ Time-ն արդեն հրապարակել է համացանցով ընթերցողների քվեարկության արդյունքերը, որոնց համաձայն՝ «Տարվա մարդ» է ճանաչվել Հյուսիսային Կորեայի առաջնորդ Կիմ Չեն Ունը:
Համառոտ ցուցակում ընդգրկված է 14-ամյա պակիստանցի ակտիվիստուհի Մալալա Յուսաֆզային, որը պայքարում է պակիստանցի երիտասարդների իրավունքների համար, ԱՄՆ նախագահ Բարաք Օբաման, Եգիպտոսի նախագահՄուհամմադ Մուրսին: Ցուցակում են նաև Բիլ և Հիլարի Քլինթոնները՝ իրենց համաշխարհային մարդասիրական գործունեության համար:
Տիտղոսի վերջին հավակնորդն է դարձել ոչ թե մարդ, այլ Հիգսի բոզոնը՝ մասնիկ, որը պատասխանատու է մյուս բոլոր տարրական մասնիկների կշռի համար: Այս տարվա հուլիսին գիտնականներն աշխարհին ներկայացրին նոր, ամենածանր բոզոնը ստանդարտ մոդելի մասնիկների ընտանիքում:
Time ամսագիրը «Տարվա մարդու» տիտղոսը բաշխում է 1927 թվականից:
