ԱՄՆ սենատոր Քենթ Կոնրադը նամակ է հղել ադրբեջանական համայնքի անդամներին: Ըստ АПА գործակալության` սենատորը իր նամակում անդրադարձել է 2011թ.-ին ԱՄՆ ֆինանսական հատկացումներին:
«2011թ.-ի փետրվարի 19-ին Ներկայացուցիչների պալատը հաստատել է 2011թ.-ի հատկացումները, և ընդունված փաստաթղթով կարգավորվում է մինչև այս տարեվերջ տրամադրվելիք գումարների չափը»:
Կոնրադը ադրբեջանական համայնքին վստահեցրել է, թե նկատի կունենա ադրբեջանցիների մտահոգությունը Լեռնային Ղարաբաղին օգնություն հատկացնելու կապակցությամբ: Նա հիշեցրել է, որ սկսած 1998թ.-ից ԱՄՆ-ը զանազան մարդասիրական ծրագրերի շրջանակում Լեռնային Ղարաբաղին հատկացրել է 36 միլիոն դոլար: 2010թ.-ին օգնության ծրագրերով հատկացված գումարի չափը կազմել է 8 միլիոն դոլար:
Սենատորը հայտարարել է. «2011թ.-ին օրենսդիրները ընդունելի են համարել Եվրոպային, Եվրասիային և Կենտրոնական Ասիային, այդ թվում նաև` Լեռնային Ղարաբաղին հատկացվելիք ընդհանուր օգնությունը մոտ 45 միլիոն դոլարով նվազեցնելու տարբերակը»: Սակայն այդ օրենսդրական ակտը առայժմ հաստատված չէ Սենատի կողմից: Ուստի սենատորը ադրբեջանցիներին իբր հավաստիացրել է, թե «միջոցների հատկացման ընթացքում ինքը հաշվի կառնի Լեռնային Ղարաբաղին հատկացվելիք օգնության գումարը նվազեցնելու ադրբեջանական համայնքի կարծիքը»:
