Բրյուսելը դեմ չի լինի, եթե մյուս ֆրանսիացիները հետևեն Ժերար Դեպարդիեի օրինակին և հարկերի պատճառով փախչեն Բելգիա։ Այդ մասին հայտարարել է Բելգիայի ԱԳ նախարար Դիդյե Ռեյնդերսը՝ Le Figaro-ին տված հարցազրույցում։
Ռեյդերսը ասել է. «Պետք չէ Բելգիային քավության նոխազ դարձնել։ Եթե հարկային ծանր բեռի պատճառով ֆրանսիացիները փախչում են Բելգիա, ապա ես դեմ չեմ դրան։ Սխալ է կարծել, թե Բելգիան հարկային գայթակղություններով միտումնավոր գրավում է ֆրանսիացիներին։ Ֆրանսիական կառավարությունն այդ քայլով գովազդում է բելգիական հարկային համակարգը։
Նախարարը հավելել է, որ իր երկրում էլ նման դեպքեր լինում են. քաղաքացիները գնում են Մոնակո կամ այլ երկիր, որտեղ հարկերը քիչ են։ Սակայն նախարարը դրա համար իրեն թույլ չի տալիս որևէ մեկի անձնականին անդրադառնալ։
Նախարարը մեկնաբանել է նաև Դեպարդիեի հետ կապված սկանդալը։ ԶԼՄ-ներում հաղորդվել էր, որ դերասանը Բելգիայում սեփականություն է ձեռք բերել և ուզում է քաղաքացիություն ստանալ։ Ֆրանսիայի վարչապետ Ժան-Մարկ Էյրոն Դեպարդիեի այդ քայլը համարել է ողորմելի։
Դերասանը, դրան ի պատասխան, որոշել է հրաժարվել Ֆրանսիայի քաղաքացիությունից։ Իր խոսքերով՝ 2012-ին իր եկամուտների 85 տոկոսը հարկեր է վճարել, 45 տարվա նրա վճարած հարկերի գումարը կազմում է 145 մլն եվրո։
Հոկտեմբերի կեսերին Ֆրանսիայի Ազգային Ասամբլեան հավանության է արժանացրել օրինագիծը, համաձայն որի՝ տարեկան եկամուտները, 1 մլն դոլարն անցնելու դեպքում, հարկվելու են 75 տոկոսի չափով։ Այս հարվածի տակ կընկնի մոտ 1 500 ֆրանսիացի, յուրաքանչյուրից հարկումը միջինը կավելանա 140 000 եվրոյով։ Պետությունը հարկային այս նոր մարտավարությամբ նախատեսում է տարեկան լրացուցիչ 210 000 եվրոյի մուտքեր ապահովել։
