Մարտի 11-18-ը օտարերկրյա ներդրողները գնել են ճապոնական ընկերությունների բաժնետոմսերի ռեկորդային քանակ: Այս մասին հաղորդում է Bloomberg գործակալությունը` հղում կատարելով Ճապոնիայի ֆինանսների նախարարությանը: Այդ ժամանակահատվածում նրանք գնել են 891 մլրդ իենի բաժնետոմսեր (մոտ 11 մլրդ դոլար):
Տոկիոյի ֆոնդային բորսայի տվյալներով, մարտի 11-ի երկրաշարժին և ցունամիին հաջորդած ժամանակահատվածում օտարերկրյա ներդրողները 955 մլրդ իենով ավելի շատ գնում են կատարել, քան վաճառք իրականացրել: Այս առումով սա աննախադեպ ցուցանիշ է սկսած 2005թ.-ից:
Հակառակ սրան, ճապոնացի ներդրողները ձգտել են գնել օտարերկրյա ընկերությունների բաժնետոմսեր: Իրականացվել են 291 մլրդ իենի գործարքներ:
Գործակալությունը նշում է, որ ճապոնական ընկերություններւմ օտարերկրյա ներդրողների մասնաբաժինը կազմում է մոտ 70%: Չնայած այն հանգամանքին, որ երկրաշարժից հետո ճապոնական հիմնական ֆոնդային ինդեքսը` Nikkei 225-ը, նվազել է 8%-ով, սակայն վերջին օրերին աճը հուսադրող է: Օրինակ` մարտի 18-ին այն աճել է 1%-ով, իսկ մարտի 22-ին` 4%-ով:
