ԱԺ պատգամավորներ Լևոն Զուրաբյանի և Վարդան Օսկանյանի զրույցի գաղտնալսման ու հրապարակման փաստն այսօր ամենաթեժ քննարկվող հարցն է դարձել՝ ստվերելով ներքաղաքական դաշտի մյուս բոլոր իրադարձությունները: ԱԺ ՀՅԴ խմբակցության պատգամավոր Վահան Հովհաննիսյանը «Ժողովուրդ»-ի հետ զրույցում ասաց, որ անթույլատրելի է համարում կատարվածը:
– Ի՞նչ գնահատական կտաք ԱԺ երկու պատգամավորների զրույցի գաղտնալսման փաստին:
– Եթե գաղտնալսումը կատարվել է առանց դատական որոշման, կատարվել է անօրինականորեն՝ անկախ նրանից, թե որ մարմինը, անհատ քաղաքացին, թե սրճարանի տերն է դա իրականացրել, ոչ մի տարբերություն չկա՝ ով է արել, եթե արել է անօրինական կերպով, ապա մեղավորը պետք է պատժվի, ուստի պետք է դիմել համապատասխան մարմիններին ու պահանջել, որ անօրինականություն անողը պատժվի: Իսկ այդ զրույցի բովանդակությունը ես չեմ ցանկանում մեկնաբանել, քանի որ այն ինձ չի հետաքրքրում:
– Հաշվի առնելով Ձեր քաղաքական փորձառությունը՝ ի՞նչ եք կարծում՝ այդ երևույթները պատահակա՞ն են, թե՞ ոչ, և գաղտնալսումը համապատասխան մարմիննե՞րն են արել, թե՞ ինչ-որ ֆիզիկական անձ:
– Կարելի է ենթադրել, որ գաղտնալսումներ կատարվում են, և կատարվում են հաճախ, ընդ որում, ոչ միայն նշված քաղաքական ուժերի ներկայացուցիչների նկատմամբ: Պարզապես այլ բան, թե ինչ է նշանակում գաղտնալսման հրապարակումը: Ես չգիտեմ՝ այդ գաղտնալսումները սկզբում որտեղ են հրապարակվել: Դա քննությունը պետք է պարզի: Բայց հրապարակումը ցույց է տալիս, որ դրանով ինչ-որ արդյունք են ուզում քաղել: Սակայն այդպես քաղած արդյունքը, կարծում եմ, ճիշտ տեղ չի տանում:
– Կատարվածը, Ձեր կարծիքով, ի՞նչ քաղաքական էֆեկտ կարող է տալ. ասենք՝ սրանով փորձում են այդ գործիչներին լռեցնե՞լ, թե՞ հասարակությանն ահաբեկել:
– Գաղտնալսումը հրապարակելով՝ պետք է փորձեն մթնոլորտ ստեղծել, որովհետև եթե այն օրինական ճանապարհով չի ստացված, դատարանում չի կարող օգտագործվել որպես ապացույց: Մանավանդ որ տեքստն առանձնապես ինչ-որ բան չի ներկայացնում իրենից: Սա այն մեկի դեպքը չէ, որ գաղտնալսել էին, հետո ասում էին, թե բրիտանական լրտես է: Այստեղ պարզապես քաղաքական թեմայով խոսակցություն է, որը մեկին կարող է դուր գալ, մյուսին՝ ոչ: Նշանակում է՝ արվել է հասարակական մթնոլորտ ստեղծելու համար: Բայց մեր երկրում իշխանության ու որոշ ընդդիմադիր ուժերի ջանքերով հասարակական, քաղաքական մթնոլորտն այնպես է ապականված, որ մի խոսք ավելի, մի խոսք պակաս՝ոչ մի բան չի փոխի:
– Տեսակետ կա, որ այսպիսով վերադառնում են խորհրդային «հին ու բարի ժամանակները», երբ ԿԳԲ-ն ամենուր էր, հետևում ու գաղտնալսում էր ամենքին:
– Իսկ ե՞րբ էինք դուրս եկել «սովետական հին ու բարի ժամանակներից», որ հիմա այդպես եք ասում:
– Ինքներդ նման դեպքերի ականատես լինելով՝ Զեր զրույցներում զգուշանո՞ւմ եք, թե ոչ:
– Բացարձակապես, երբեք չեմ զգուշացել և այն ժամանակ՝ ձերբակալումից առաջ, և ձերբակալված ժամանակ՝ բանտում, ոչ էլ բանտից հետո: Ես ինչ մտածում եմ, ասում եմ: Ի դեպ, ժամանակին, երբ «Վիկիլիքս»-ը հրապարակում էր ինչ-որ բաներ, նաև ՀՅԴ-ականների խոսակցություններից հատվածներ կային, ու ՀՅԴ-ականներից ոչ մեկը պարտավորված չեղավ հերքել այն կամ հիմնավորել ասածները: Բացարձակապես: Ինչ ասել ենք, ասել ենք: Ես հիմա բաց միջավայրում ասում եմ այն, ինչ ասում եմ փակ միջավայրում:
