Կենտրոն և Նորք-Մարաշ վարչական շրջանների ընդհանուր իրավասության դատարանում Մեսրոպ Մակյանի նախագահությամբ ընթանում է Արսեն Փահլևանյանի գործի դատական քննությունը:
Ըստ մեղադրանքի՝ 18-ամյա Արսեն Փահլևանյանը 2014 թվականի հունվարի 1-ին Հյուսիսային պողոտայի «Այվի» սրճարանի մոտ վիճաբանել է Արթուր Հարությունյանի հետ:
Փահլևանյանն իր մոտ եղած դանակով հարվածել է Հարությունյանի մեջքին՝ դիտավորությամբ նրա առողջությանը պատճառելով ծանր վնաս:
Արսեն Փահլևանյանին մեղադրանք է առաջադրված ՀՀ քրեական օրենսգրքի 112 հոդվածի 1-ին մասով:
Փահլևանյանի խափանման միջոցը ստորագրությունն է չհեռանալու մասին:
Գործի դատական քննությունը վկաների հարցաքննության փուլում է:
Հարցաքննվեց ամբաստանյալ Արսեն Փահլևանյանի եղբայր Սուրենը, ով նույնպես դեպքի պահին եղել էր «Այվի» սրճարանում:
Սուրենն ասաց, որ իրենց ծնողները Նոր տարին դիմավորում էին ռեստորանում՝ ընկերների հետ:
Ինքն ու եղբայրը որոշել էին տանը նշել Ամանորը: Սակայն իրենց տանը դեկտեմբերի 31-ի երեկոյան լույս չկար: Իրենք էլ որոշել են Նոր տարին իրենց ընկեր Մեսրոպի հետ դիմավորել երևանյան սրճարաններից մեկում:
Զանգահարել են «Այվի» սրճարան ու սեղան են պատվիրել երեք հոգու համար:
Խմել են ինքն ու Մեսրոպը: Օղի ու շամպայն են խմել, հետո վատ են զգացել՝ խմիչքները խառնելու պատճառով: Արսենը չի խմել, որ մեքենան վարի:
Վկան ասաց, թե երեկոյի ավարտին ինքը դուրս է եկել սրճարանից ու տեսել, որ սրճարանի մոտ վեց-յոթ անծանոթներ դաժանաբար ծեծում են Մեսրոպին: Վերջինս գետնին ընկած էր:
Իր գլխում միայն մի միտք է եղել՝ ինչպե՞ս օգնի, փրկի Մեսրոպին: Մոտեցել է, որ օգնի, բայց իրեն էլ այնպես են խփել, որ քթի կոտրվածք է ստացել:
«Մնացածը խավար եմ հիշում»,- ասաց վկան:
Վկան հայտնեց, որ ծեծող տղաներին նախկինում երբեք չէր տեսել, մինչև հիմա էլ իրեն հայտնի չէ, թե նրանք ինչո՞ւ էին ծեծում Մեսրոպին, ինչի՞ց էր առաջացել վեճը:
Տուժողին՝ Արթուր Հարությունյանին, չի ճանաչում: Կարծում է՝ նրանք Մեսրոպին ինչ-որ մեկի հետ «խառնել էին»:
Վկան հայտնեց, որ դեպքից հետո, քանի որ ծեծված է եղել, աչքի տակը կապտած, քիթը՝ ջարդված, տուն չի գնացել, որ ծնողներն իրեն այդ տեսքով չտեսնեն: Ծնողներին ասել են, թե գնում են Ծաղկաձոր:
Գնացել է Մեսրոպենց տուն, նրանք հարևանությամբ են ապրում:
Հունվարի 5-6-ին եղբոր հետ մեկնել է Մոսկվա: Իրենք վաղուց էին ծրագրել, որ Մոսկվա գնան: Հիմա առիթն առաջացել էր, իրեն հարկավոր էր քիթը «դզել»:
Մոսկվայում տնային պայմաններում քթին գիպս են դրել:
Արսենն իրեն ասել է՝ ես տեսա, որ քեզ ու Մեսրոպին դաժան ծեծի են ենթարկում, դանակով խփեցի, որ ձեզ պաշտպանեմ:
Վկան թերահավատորեն է վերաբերվում եղբոր խոստովանությանը:
Ավելի վաղ մեղայականով ոստիկանություն է ներկայացել նաև Մեսրոպը, խոստովանել, թե ինքն է տուժողին դանակահարել, որպեսզի օգնի ծեծվող Սուրենին:
Չնայած Մեսրոպի խոստովանական ցուցմունքին, գործով նա չէ ամբաստանյալը: Նա վկա է:
Նախաքննությամբ չի հաստատվել, որ տուժողին դանակահարել է Մեսրոպը:
Դանակահարության ու ծանր մարմնական վնասված պատճառելու մեղադրանքն առաջադրվել է Արսենին, ու հիմա ամբաստանյալի աթոռին է երկրորդ ինքնախոստովանողը՝ Արսեն Փահլևանյանը:
Վկա Սուրենն ասաց, թե ինքն ականատես չի եղել, որ Մեսրոպը ինչ-որ մեկի հետ առճակատման մեջ լինի սրճարանում:
Ինքը եղբոր ու Մեսրոպի մոտ երբեք դանակ չի տեսել, չի հավատում, թե նրանք ունակ են ինչ-որ մեկին դանակով հարվածելու, «նրանք երևի մեկը մեկին պահելու համար են այդպես ասում»:
Վկան ենթադրեց, թե տուժողը գուցե այլ վայրում է ստացել իր ծանր վնասվածքը:
Քթի կոտրվածք ստանալուց հետո, ըստ վկայի, ինքը գտնվել է անգիտակից վիճակում: Ուշքի է եկել, երբ եղբայրն իրեն մեքենա էր նստեցնում: Մեսրոպն արդեն մեքենայում էր, նրա վիճակը ևս շատ վատ էր:
Վկան ներկայացրեց լուսանկար, որում պատկերված էր ինքը՝ աչքի տակը կապտած, քիթը՝ ուռած: Վկան ասաց, թե «սելֆի» է արել իրեն, որ այդ վիճակում տեսնի՝ ինչ տեսք ունի: «Նման վիճակում երբեք չեմ եղել»:
Նախաքննության ժամանակ վկան ասել է, թե կռվի ժամանակ իրեն ծեծել են, ինքը տեսել է՝ ինչպես եղբայրը դանակով խփեց ծեծողներից մեկին:
Դատարանում վկան ասաց, թե նախաքննական ցուցմունքն իրականությանը չի համապատասխանում:
Ինքը ոստիկանություն է գնացել իր փաստաբանի հետ: Քննիչն իրեն մի առանձին սենյակ է տարել, «գլխին ավետարան է կարդացել»՝ տուժողը թեթև վնասվածք է ստացել, էս գործը փակվելու է, մենք հարգում ենք ձեր ոստիկան հորը, միայն թե դու գրի, որ տեսել ես խփելու պահը: «Ես էլ հավատացի ու գրեցի՝ մտածելով, թե Արսենին օգուտ կտա»:
Սուրենն ասաց, թե իր փաստաբանը հետաքրքրվել է՝ ինքն ինչ է գրում, ինքն էլ ասել է՝ դուք մի խառնվեք, ինչ պետք ա՝ գրում եմ:
Վկան ասաց, թե «Այվիի» զուգարանում եղել է, այնտեղ տեսել է Մեսրոպին, ով լվացվում էր:
Կա տեսանկարահանված նյութ, սակայն ինքը այդ տեսագրության մեջ ոչ ոքի չի ճանաչել: Քննիչն ասել է՝ կոստյումովը դու ես: Բայց դեպքի օրն ինքը կոստյում չէր հագել:
Ըստ վկայի՝ սա առանձնահատուկ գործ է: Ուրիշ գործերով ասում են՝ ես չեմ, ես չեմ արել, իսկ էստեղ ուրիշ է՝ երկու հոգի ասում են՝ ես եմ արել, ես եմ արել:
Վկան ասաց, որ նախաքննության ժամանակ ճիշտը չի ասել, մտածել է՝ դատարանում ճիշտը կասի:
«Մենք էինք ծեծված, մենք էինք տուժող…»,- ասաց վկան:
Ըստ վկայի՝ իր նկատմամբ նախաքննության ժամանակ բռնություն չի գործադրվել, սպառնալիքներ չեն հնչել: Քննիչը միայն ուղղորդել է իրեն, նաև ասել է՝ մենք քո հորը հարգում ենք:
Վկան ասաց, թե իրենց հայրը խստապահանջ է: Հենց հայրն է զանգել Մոսկվա ու ասել՝ վերադարձեք, ձեզ մեղադրում են, թե մարդ եք խփել:
Արսենը շուտ է եկել Երևան՝ հունվարի 16-ին, իսկ Սուրենը վերադարձել է հունվարի 26-ին:
Սուրենը մանկուց զբաղվել է կարատեով: Հայաստանի բազմակի չեմպիոն է, մեկ անգամ էլ աշխարհի չեմպիոն է եղել:
Դատական նիստին չէր ներկայացել տուժող Արթուր Հարությունյանը:
Հաջորդիվ կհարցաքննվի ամբաստանյալ Արսեն Փահլևանյանը: