Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ շարունակվում է Շանթ Հարությունյանի և մյուսների գործի դատական քննությունը:
Ըստ մեղադրանքի՝ ամբաստանյալները մեղադրվում են խմբի կազմում որպես զենք գործադրվող առարկաների գործադրմամբ խուլիգանություն կատարելու համար՝ զուգորդված իշխանության ներկայացուցչին դիմադրություն ցույց տալով:
Ամբաստանյալի աթոռին են Շանթ Հարությունյանը, Արթուր Մարգարյանը, Ալեք Պողոսյանը, Արմեն Հովհաննիսյանը, Ավետիս Ավետիսյանը, Հայկ Հարությունյանը, Լիպարիտ Պետրոսյանը, Միսակ Առաքելյանը, Մկրտիչ Հովհաննիսյանը, Սևակ Մնացականյանը, Շահեն Հարությունյանը, Տիգրան Պետրոսյանը, Վահե Մկրտչյանը, Վարդան Վարդանյանը:
Այսօր դատարանն ունկնդրեց մեղադրող Գևորգյանի ճառը:
Դատախազը նշեց, որ գործով հաստատված են ամբաստանյալներին մեղսագրված արարքները: Ճիշտ է, ամբաստանյալների մեծ մասն իրեն մեղավոր չի ճանաչել, սակայն բոլորն ընդունել են, որ կատարել են անօրեն արարքներ՝ հարվածել են փայտով, պայթեցրել են պայթուցիկներ: Նրանց մեղքը, ըստ մեղադրողի, հաստատվել է տուժողների, վկաների մի մասի ցուցմունքներով: Այս գործն առանձնահատուկ է նաև նրանով, նշեց մեղադրողը, որ ամբաստանյալների մեղքը հաստատվել է նաև տեսաձայնագրություններով:
Մեղադրողը որպես ամբաստանյալների պատասխանատվությունն ու պատիժը ծանրացնող հանգամանքներ համարեց նրանց ակտիվ դերը, հանցավոր արարքները հանրության համար վտանգավոր եղանակով կատարելը:
Մեղադրող Գևորգյանը միջնորդեց.
Շանթ Հարությունյանին դատապարտել 7 տարի ազատազրկման:
Արթուր Մարգարյանին դատապարտել 8 տարի ազատազրկման:
Ալեք Պողոսյանին դատապարտել 6 տարի ազատազրկման:
Արմեն Հովհաննիսյանին դատապարտել 4 տարի ազատազրկման:
Ավետիս Ավետիսյանին դատապարտել 6 տարի 6 ամիս ազատազրկման:
Հայկ Հարությունյանին դատապարտել 6 տարի ազատազրկման:
Լիպարիտ Պետրոսյանին դատապարտել 6 տարի 6 ամիս ազատազրկման:
Միսակ Առաքելյանին դատապարտել 50 հազար դրամ տուգանքի:
Մկրտիչ Հովհաննիսյանին դատապարտել 5 տարի 6 ամիս ազատազրկման:
Սևակ Մնացականյանին դատապարտել 4 տարի ազատազրկման:
Շահեն Հարությունյանին դատապարտել 5 տարի ազատազրկման:
Տիգրան Պետրոսյանին դատապարտել 4 տարի ազատազրկման:
Վահե Մկրտչյանին դատապարտել 8 տարի 6 ամիս ազատազրկման:
Վարդան Վարդանյանին դատապարտել 6 տարի 6 ամիս ազատազրկման:
Մեղադրողի միջնորդած խիստ պատիժները ոչ միայն կոնկրետ այս ամբաստանյալներին են վերաբերում, այլև, ըստ էության, նպատակ են հետապնդում վախեցնել քաղաքական ակտիվություն հանդես բերող, ներկա պահին ազատության մեջ գտնվող քաղաքացիների աչքը:
Մեղադրողը որպես ծանրացուցիչ հանգամանք՝ համարյա բոլոր ամբաստանյալների դեպքում նշեց հանցավոր արարքները հանրության համար վտանգավոր եղանակով կատարելը, բայց կարելի է ասել, որ ամբաստանյալների արարքները կատարվել էին ավելի շատ՝ իշխանությունների համար վտանգավոր եղանակով: Նման ակտիվությունը կարող էր վարակիչ լինել, եթե ի դեմս ներկայումս դատվող ամբաստանյալների, օրենքի գործադրմամբ, խիստ վերաբերմունք չդրսևորեն ու ակտիվ քաղաքացիներին տևական ազատազրկման հեռանկարով չստիպեն ավելի վախվորած լինել…
Դատարանը ժամանակ տրամադրեց պաշտպաններին՝ պաշտպանական ճառերին նախապատրաստվելու համար:
Հաջորդ դատական նիստը տեղի կունենա սեպտեմբերի 22-ին:
