ԲՀԿ հայտարարությունը թույլ է տալիս ենթադրել, որ գալիք նախագահական ընտրություններում Հայաստանի երկրորդ քաղաք Գյումրիում ԲՀԿ կառույցները որևէ թեկնածուի չեն սատարելու: Հաշվի առնելով այն հանգամանքը, որ վերջերս Գյումրիում կայացած ՏԻՄ ընտրություններում իշխող վերնախավը պաշտպանեց ԲՀԿ-ական Սամվել Բալասանյանի թեկնածությունը, այնուհետև դեկտեմբերի 2-ին ԱԺ լրացուցիչ ընտրություններում Գյումրիի քաղաքապետ Սամվել Բալասանյանը ԲՀԿ ընտրատեղամասային կառույցի անունից իր աջակցությունը հայտնեց քաղաքի թիվ 35 ընտրատեղամասում առաջադրված պատգամավորության թեկնածու, հանրապետական Արման Սահակյանին, հարց է առաջանում, թե գալիք նախագահական ընտրություններում ԲՀԿ Գյումրիի կառույցը ի՞նչ մոտեցումներ կորդեգրի՝ կսատարի՞ գործող նախագահ Սերժ Սարգսյանի թեկնածությունը, թե՞ կմնա սեփական կուսակցության հայտարարությանը հավատարիմ:
«Առաջին լրատվական»-ն այս հարցի շուրջ զրուցեց քաղաքագետ Գագիկ Համբարյանի հետ, ով նշեց, որ Շիրակի մարզի ԲՀԿ կառույցներում ընդգրկված են մարդիկ, ովքեր ունեն իրենց շահերն ու սեփական տեսակետները տարբեր հարցերի վերաբերյալ, այսինքն՝ասել, որ Շիրակի մարզի ԲՀԿ կառույցների դիրքորոշումներում տարբերություն չկա, սխալ է: Ըստ քաղաքագետի՝ ԲՀԿ-ն այն կուսակցություններից է, որտեղ անձնական շահերը շատերի համար ավելի վեր են դասվում, քան՝կուսակցական: Գագիկ Համբարյանի համոզմամբ՝Գյումրին հետ չի մնա նախագահական ընտրությունների թոհուբոհից, և բոլոր ընտրություններում էլ կարևոր դերակատարություն ունեցող քաղաք կմնա, ինչպես եղել է՝ սկսած 1991 թվականից,վերջացրած վերջին ԱԺ ընտրություններով:
«Պետք չէ մոռանալ, որ ԲՀԿ-ն հենց Գյումրիում ապահովեց իր բավական մեծ քանակությամբ ձայները՝ ԱԺ ներթափանցելու համար»,- նկատեց նա:
Անդրադառնալով նախագահական ընտրություններին՝ քաղաքագետը կանխատեսեց, որԲՀԿ առաջնորդ Գագիկ Ծառուկյանի ձայները կբաշխվեն դաշտում գործողթեկնածուների միջև: Գագիկ Համբարյանի համոզմամբ՝ ձայներ կանցնեն, թե՛Հանրապետական կուսակցության թեկնածու Սերժ Սարգսյանին, թե՛ «Ժառանգության» թեկնածու Րաֆֆի Հովհաննիսյանին, թե՛ ՀԱԿ-ից որևէ թեկնածուի, եթե նա «պոպուլյար» լինի:
«Հանրապետական թեկնածուի օգտին կքվեարկի ԲՀԿ-ի այն ընտրազանգվածը, որը,լինելով ԲՀԿ անդամ, միշտ կողմ է եղել իշխանության նկատմամբ ԲՀԿ լոյալ քաղաքականությանը։«Ժառանգության» և ՀԱԿ-ի թեկնածուներին ձայներ կտան ԲՀԿ այն անդամները, ովքեր միշտ կողմ են եղել, որ ԲՀԿ-ն Հանրապետական կուսակցությունից անկախ քաղաքականություն վարի»,- ասաց քաղաքագետը:
Սակայն, նրա կարծիքով, ինչպես դեկտեմբերի 2-ին Գյումրիի թիվ 35 ընտրատարածքում քաղաքապետ Սամվել Բալասանյանը սեփական նախաձեռնությամբ հանդես եկավ, այնպես էլ կլինի գալիք նախագահական ընտրությունների ժամանակ:
«Պարոն Բալասանյանի կողմից հանրապետական թեկնածուին պաշտպանելը մի փոքրիկ շնորհակալություն էր գործող իշխանություններին այն բանի համար, որ քաղաքապետի ընտրությունների ժամանակ Սերժ Սարգսյանը Գյումրին «նվիրեց» ԲՀԿ-ին, մասնավորապես՝ Սամվել Բալասանյանին: Լինելով գործող նախագահի նախընտրած թեկնածուն և հաղթելով ՏԻՄ ընտրություններում՝ Սերժ Սարգսյանի նախընտրած թեկնածուն ամեն ինչ պետք է անի, որպեսզի իր վերադասը՝ հանրապետության նախագահը, վերընտրվի նախագահ: Այստեղ խնդիրը հետևյալում է,որ այդ գործընթացը կարվի ո՛չ պաշտոնապես, ո՛չ բացահայտ»,- մեկնաբանեց Գագիկ Համբարյանը՝ հավելելով, որ Գյումրիի գործող քաղաքապետ Սամվել Բալասանյանի կողմնակիցները, իր կողմից աշխատանքի ընդունված ԲՀԿ-ականները, որոնք ունեն տարբեր կարծիքներ, կներքաշվեն ՀՀ նախագահի թեկնածությունը գալիք նախագահական ընտրություններում ոչ պաշտոնապես պաշտպանելու գործընթացի մեջ:
