«Առաջին լրատվական»-ի տեղեկություններով, Էրեբունի և Նուբարաշեն վարչական շրջանների ընդհանուր իրավասության դատարանի դատավոր Վլադիմիր Գրիգորյանի նկատմամբ Հատուկ քննչական ծառայությունում նյութեր են նախապատրաստվում կաշառք ստանալու մեղադրանքով: Քրեական գործի հարուցումից հետո անգամ նրա օգնականն է կալանավորվել, սակայն Վերաքննիչ դատարանը բեկանել է կալանքի որոշումը և կայացրել ստորագրությամբ չհեռանալու մասին որոշում: Իսկ ամեն ինչ սկսվել է նրանից, որ մի քրեական գործի շրջանակներում կայացրած մեղադրական դատավճռից հետո ամբաստանյալը դատարանում հայտարարել է, թե «քո ուզած 2 հազար դոլարը չտվեցի, դրա համար ես նման դատավճիռ կայացնում»: Այդ հայտարարությունից հետո մեղադրանքը պաշտպանող դատախազը տեղում արձանագրություն է կազմել և նյութերն ուղարկել Հատուկ քննչական ծառայություն, որտեղ էլ այս պահին նյութեր են նախապատրաստվում:
Հիշեցնենք, որ Վլադիմիր Գրիգորյանի որդին՝ Արման Գրիգորյանը, ևս հայտնվեց մի սկանդալային պատմության կենտրոնում: Նա մեղադրվում էր 32-ամյա մի կնոջ՝ Մարիամ Մանուկյանին բռնաբարելու և նրա վզից ոսկյա շղթան գողանալու մեջ: Մի քանի ամիս տևած նախաքննությունից հետո գործը գլխիվայր շրջվեց: Գրիգորյանին առաջադրված մեղադրանքը հանվեց, փոխարենը Մարիամ Մանուկյանին սուտ մատնության համար մեղադրանք առաջադրվեց: Գործն ուղարկվեց Աջափնյակ և Դավիթաշեն վարչական շրջանների ընդհանուր իրավասության առաջին ատյանի դատարան և վերջնական հանգուցալուծվեց: Ըստ դատավճռի` Մարիամը քննչական բաժնում ասել է, թե իր հաղորդումը չի համապատասխանում իրականությանը, որից հետո անկեղծորեն զղջացել է: Արագացված դատաքննությամբ հուլիսի 31-ին դատարանը Մարիամին մեղավոր ճանաչեց Քրեական օրենսգրքի 333-րդ հոդվածի 2-րդ մասի 1-ին կետով (ՙՀանցագործության մասին սուտ մատնություն) և որպես պատիժ սահմանեց ազատազրկում` 6 ամիս ժամկետով:
Նշենք, որ Արման Գրիգորյանը, որը նաև Մալաթիա- Սեբաստիա վարչական շրջանի ՔԿԱԳ վարչության (ԶԱԳՍ) պետ Մարիամ Մինասյանի որդին է, անցած տարի էլ նա իրենց ընտանիքին պատկանող «Իմպերիա» ռեստորանային համալիրում վիճաբանություն և ծեծկռտուք էր սարքել, որի ժամանակ անգամ կրակոցներ էին հնչել:
Փաստորեն, Գրիգորյանների ընտանիքը բավական ոչ նախանձելի վիճակում է հայտնվել: Տղան ազատվեց քրեական պատասխանատվությունից, հիմա էլ հայրն է հայտնվել նույն կարգավիճակում:
