ԱՄՆ-ն կավելացնի Ռուսաստանի հետ սահմանակից երկրներին, այդ թվում՝ նաև Մոլդովային և Վրաստանին ռազմական աջակցությունը, ուրբաթ հայտարարել է Սպիտակ տունը: Այս մասին է հաղորդում RIA Novosti-ն:
«Մենք մշակում ենք Ռուսաստանի հարևանությամբ գտնվող երկրներին, հատկապես Մոլդովային և Վրաստանին աջակցություն տրամադրելու ծրագրերը: Բարձր մակարդակի շփումների հետ մեկտեղ մենք ծրագրում ենք ավելացնել երկարաժամկետ հեռանկարում անվտանգության ոլորտում աջակցությունը»,- ասվում է Սպիտակ տան հաղորդագրության մեջ:
«Եթե ֆինանսավորում ստացվի (Կոնգրեսից), եվրոպական երկրներին աջակցելու վերաբերյալ նախաձեռնությունը կներառի նաև լրացուցիչ օգնությունը, որն ուղղված կլինի Ուկրաինայի, Մոլդովայի և Վրաստանի անվտանգության ապահովմանն ու կմեծացնի արևմտյան ուժերի հետ համատեղ օգտագործելու հնարավորությունը»,- ասվում է հաղորդագրության մեջ:
«Դրանից բացի, մենք սերտորեն համագործակցում ենք ՆԱՏՕ-ի հետ, որպեսզի մշակենք այդ երեք երկրների հետ շփման և աջակցության ավելի ակտիվ ծրագրեր»,- մասնավորեցրել է Սպիտակ տունը:
Ռուսաստանը ճգնաժամի հետ կապված արդեն նշել է իր սահմանների մոտ ԱՄՆ-ի և ՆԱՏՕ-ի աննախադեպ ակտիվությունը: Մոսկվան քննադատել է նաև սեպտեմբերի երկրորդ կեսին ծրագրված ԱՄՆ-ի, Վրաստանի, Մոլդովայի և 12 այլ պետությունների մասնակցությամբ Արևմտյան Ուկրաինայում կայանալիք զինավարժությունները: ՌԴ-ի ԱԳՆ հայտարարության համաձայն՝ այդ զինավարժությունները կնպաստեն տարածաշրջանում լարվածության աճին:
ԱՄՆ պետդեպարտամենտն իր հերթին հայտարարել է, որ հույս ունի զորավարժությունների միջոցով միայն ամրապնդել կայունությունը:
