Արմեն Կարախանյանը 18 տարի է, ինչ տնակի մեջ է ապրում, միայն թե բնակության փողոցն անընդհատ փոխվում է: Արդեն խարխուլ տնակի վերջին հասցեն Թբիլիսյան խճուղու գլխավոր փողոցն է, տնակն անգամ մայթով բաժանված չէ երթևեկելի հատվածից: 52-ամյա Արմեն Կարախանյանը այստեղ ընտանիքի հետ է ապրում՝ կնոջ և 4 որդիների: Ասում է՝ հիմա կինը տանը չէ, քանի օր է՝ 2 որդիների հետ միասին մոր տանն է, մայրը հիվանդ է, խնամքի կարիք ունի: Նրա որդիների՝ Հովսեփի, Էռնեստի, Էրիկի և Գալուստի համար հիմնական զբաղմունքը փայտի, հողի հետ խաղալն է: Հայրը, մայրը հաճախ են որդիներին հորդորում ուշադիր լինել, ասում են՝ աչքները մի րոպե կտրեն, գուցե երեխաները մեքենայի տակ ընկնեն: Ա.Կարախանյանը պատմեց, որ 40 հազար դրամ ամսական նպաստ են ստանում, ինչը անգամ սննդին չի բավարարում, 2 երեխաները գիշերօթիկում են սովորում. «Մենք մեր երեխաներին երբեք մանկատուն չենք տանի, բա հետո երեխեքին միլիոններ էլ առաջարկենք, մեր երեսին չեն նայի», շարունակ պնդում էր նա՝ հավելելով, որ լինում են անհատներ, նաև եկեղեցու ներկայացուցիչներ, որոնք օգնում են հագուստով կամ գումարով, միայն թե օգնությունը հաճախ չի լինում՝ տարին մեկ-երկու անգամ։ «Ճիշտն ասած՝ մի ամիս առաջ վարչապետն էր եկել, խոսք տվեց ընդառաջել, գնաց ասեց՝ մարդ կուղարկեմ, որ ձեզ տեղավորի, հանրակացարան կամ ինչ-որ տեղ, ասեց՝ ամոթ ա էս վիճակը», պատմեց 4 անչափահաս երեխաների հայրը՝ հավելելով, որ մինչև հիմա սպասում են, որ Հովիկ Աբրահամյանի ուղարկած մարդը գա: Կարախանյանների ավագ երեխան՝ Գալուստը, տան մոտ խաղալիս 2 տարի առաջ վրաերթի է ենթարկվել, ներքին արյունահոսություն է ունեցել։ Կյանքը փրկելու համար բժիշկները հեռացրել են նրա երիկամն ու փայծախը: Երեխան միչև հիմա էլ առողջական խնդիրներ ունի, հայրը՝ ևս, ուստի ձեռքները գումար ընկնելուն պես, հացից ավելի կարևոր են համում դեղ գնելը:
Առավել մանրամասն՝ տեսանյութում։