Ֆրանսիայի նախագահ Ֆրանսուա Օլանդի նախկին ընկերուհին՝ լրագրող Վալերի Տրիերվեյլերը իր հիշողությունների գրքում գրել է այն մասին, որ երկրի ղեկավարը արհամարանքով է վերաբերվում չունևորներին, հաղորդում է International Business Times-ը:
«Նա ցույց է տալիս, թե չի սիրում հարուստների: Իրականում նախագահը աղքատներին չի սիրում: Նա, ձախ ուժերի ներկայացուցիչը, նրանց «անատամներ» է անվանում և շատ է պարծենում իր հումորով»,- Օլանդի նախկին ընկերուհուն է մեջբերում պարբերականը:
Տրիերվեյլերի Thank You For This Moment հիշողությունների գիրքը վաճառքի կթողարկվի հաջորդ հինգշաբթի օրը:
Օլանդը և Տրիերվեյլերը պաշտոնապես ամուսնացած չէին, սակայն 2007-ից սկսած լրագրողուհին մշտապես ուղեկցում էր նրան: Ֆրանսիայում նրան առաջին տիկին էին կոչում, նա նախագահին ուղեկցում էր պաշտոնական արարողություններին և պետական այցելություններին: 2014-ի սկզբին Օլանդը հայտարարեց Տրիերվեյլերից բաժանվելու մասին: Նախագահը ժողովրդի առջև բացատրվեց այն բանից հետո, երբ հունվար ամսին Closer տաբլոիդը լուսանկարներ հրապարակեց, որոնք ապացուցում էին Ֆրանսիայի նախագահի և դերասանուհի Ժյուլի Գայեյի գաղտնի կապը:
