Թուրքական Hürriyet թերթի հաղորդմամբ, պետնախարար և ԵՄ-ին Թուրքիայի լիիրավ անդամակցության գծով գլխավոր բանագնաց Էգեմեն Բաղըշը, մասնակցելով «Արդարություն ու զարգացում» կուսակցության Աքսարայի նահանգային կառույցի կողմից կազմակերպված խորհրդաժողովին, անդրադարձել է լիբիական ճգնաժամին.
«Մենք մեր եղբայրական լիբիական ժողովրդի բնական հարստություններին տիրացող երկրներից չենք: Փոխարենը, մենք հանդիսանում ենք լիբիական ժողովրդին օգնության ձեռք մեկնող երկրներից մեկը: Մենք պատրաստվում ենք մարդասիրական օգնություն ուղարկել լիբիական ժողովրդին: Անհրաժեշտության դեպքում մենք Լիբիայում կհիմնենք մարդասիրական միջանցքներ:
Լիբիացի մեր եղբայրները կարիք ունեն սննդի, ջրի, դեղամիջոցների, և մենք նրանց երբեք չենք թողնի միջազգային կառույցների որոշմանը չսպասած և Լիբիայի վրա հարձակում գործած եվրոպական քադաֆիներին»:
Բաղըշը նաև խոսել ԵՄ-ին Թուրքիայի անդամակցությունից. «Շուրջ 50 տարի է, ինչ Թուրքիան կանգնած է ԵՄ-ի դարպասների առջև: ԵՄ-ը չպետք է աչք փակի նրա վրա, թե այդ ընթացքում Թուրքիան ինչքան առաջընթաց է գրանցել ժողովրդավարության ոլորտում: Այդ ընթացքում Թուրքիան բոլոր ոլորտներում է վիթխարի թռիչք գործել:
Եթե այն ժամանակ մեկ շնչին բաժին ընկնող ազգային եկամուտը կազմում էր 400 դոլար, ապա այսօր այդ ցուցանիշը հասել է 11.000 դոլարի: Այն ժամանակ մենք ունեինք ընդամենը 14 համալսարան, մինչդեռ այսօր համալսարաններ ունեն բոլոր 81 նահանգները, ընդհանուր առմամբ՝ 165 համալսարան: Եթե այն ժամանակ զբոսաշրջությունից ստացված եկամուտները գնահատվում էին 9 միլիոն դոլար, ապա այժմ հասել է 30 միլիարդ դոլարի:
Այն ժամանակ թուրքերի ամենամեծ հույսը Գերմանիան էր, մինչդեռ այսօր Գերմանիան գրավում է միայն թուրք ֆուտբոլիստներին, կինոռեժիսորներին, փաստաբաններին ու ինժեներներին»:
Հիշեցնենք, որ, երբ 2010 թվականի հոկտեմբերի 3-ին լրացավ իր անդամակցության շուրջ Թուրքիայի հետ ԵՄ-ի բանակցություններ սկսելու հնգամյակը, Բաղըշը հայտարարեց. «Մեր ժողովուրդն ականատես է լինում երկակի ստանդարտների կիրառման: Թուրքիայի ու ԵՄ-ի միջև գործող վիզային ռեժիմը Թուրքիան մեկուսացնում է ԵՄ-ից: Չնայած դրան` Թուրքիան այսօր էլ նույն խանդավառությամբ ու նպատակամղվածությամբ շարունակում է ԵՄ-ին ինտեգրվելու գործընթացը, սակայն կան այնպիսիները, որոնք ստուգում են Թուրքիայի համբերությունը:
Մեր եվրոպական գործընկերները ստիպված են որևէ որոշում կայացնել: Ինչպես նշում է մեր վարչապետը, Թուրքիան այն երկիրը չէ, որին կարելի է կանգնեցնել շեմին: Թուրքիան աղքատ մուսուլմանական երկիր չէ. Թուրքիայում մեկ շնչին բաժին ընկնող ազգային եկամտի մակարդակը ԵՄ-ի անդամ որոշ երկրներից էլ բարձր է»:
