Ադրբեջանական Turan լրատվական գործակալության փոխանցմամբ՝ ԵԽԽՎ-ի մոնիթորինգային կոմիտեն Ադրբեջանի իշխանություններին կոչ է արել ակտիվացնել դեմոկրատական ինստիտուտների գործունեության ոլորտում օրենսդրության իրագործման աշխատանքները:
Այդպիսի կոչ է արված երեկ Փարիզում Ադրբեջանի գծով ԵԽԽՎ-ի համազեկուցողներ Պեդրո Ագրամունտի ու Ջոզեֆ Գրեշի պատրաստած հաշվետվությունում, որում խոսք է գնում ԵԽ-ի առջև Ադրբեջանի ստանձնած պարտավորությունների կատարման ու համապատասխան խորհուրդների մասին:
Հաշվետվությունում համազեկուցողներն ընդգծել են, որ ԵԽ-ին անդամակցելուց ի վեր՝ Ադրբեջանը որոշակի առաջընթաց է գրանցել օրենսդրական բազայի ստեղծման հարցում՝ դեմոկրատական ինստիտուտների գործունեության համար: Սակայն, միևնույն ժամանակ, մի շարք օրենքների խախտումն ու սահմանափակումներ մտցնելը աճող մտահոգություն է առաջացնում օրենքի գերակայության ապահովման ու մարդու իրավունքների հարգման համար:
Խնդիրներ են շարունակում մնալ՝ կապված դատական համակարգի անկախության հետ: Քաղաքական բազմակարծության ապահովման հարցում զեկույցում նշված է, որ Ադրբեջանում հայտնի մի շարք ընդդիմադիր կուսակցություններ ներկայացված չեն խորհրդարանում: Միևնույն ժամանակ, իշխող «Ենի Ազերբայջան» կուսակցությունը միակն է, որն իրավունք ունի խորհրդարանում ստեղծել քաղաքական խմբակցություն:
Մոնրիթորինգային կոմիտեն ափսոսանք է հայտնում ընդդիմադիր կուսակցությունների հետ «քաղաքական երկխոսության» բացակայության կապակցությամբ: Զեկույցի հեղինակները «մտահոգիչ» են որակել ազատ արտահայտվելու և ազատ հանրահավաքներ անցկացնելու հարցում առկա իրադրությունը: Մտահոգություն են պատճառում նաև կեղծ մեղադրանքներով լրագրողների ու ակտիվիստների ձերբակալությունները:
Անարդար դատական քաշքշուկները հանգեցնում են մարդկանց սիստեմատիկ ձերբակալությունների, որոնց կարելի է համարել «խղճի բանտարկյալներ»: Մտահոգության տեղիք են տալիս նաև ոչ վաղ անցյալում օրենսդրության մեջ կատարված ուղղումները, որոնցով մեծացվել են «չարտոնված» ակցիաներին մասնակցելու և դրանք կազմակերպելու համար սահմանված տուգանքները: Խնդիրներ կան նաև կոռուպցիայի ու հանցավորության դեմ արդյունավետ պայքար մղելու հարցում:
Մոնիթորինգային կոմիտեի կողմից հավանության արժանացած բանաձևի նախագծում մի շարք խորհուրդներ են տրվում վերոնշյալ խնդիրների լուծման ուղղությամբ, ինչը, մասնավորապես, վերաբերում է ենթադրյալ քաղբանտարկյալների ազատարձակմանը, ընտրական համակարգի կատարելագործմանը, հասարակական կազմակերպությունների գրանցման խոչընդոտների վերացմանը, միջազգային հասարակական կազմակերպությունների գրանցման ընթացակարգերի դյուրացմանը, խորհրդարանում ընդդիմադիր խմբակցության ստեղծման համար պայմանների ապահովմանը:
Զեկույցում խոսք է գնում նաև Ղարաբաղյան հակամարտության չկարգավորված լինելու մասին: Նշվում է, որ նախկինում համազեկուցողները զերծ էին մնում Ադրբեջանում մարդու իրավունքների խնդրին գնահատական տալուց: Բանաձևի նախագիծը ներկայացվել է ԵԽԽՎ-ի ձմեռային նստաշրջանի հաստատմանը, որը կայանալու է հունվարի 21-25-ը Ստրասբուրգում: