Վրացական «Ախալի Թաոբա» թերթի փոխանցմամբ՝ 2013 թվականին Վրաստանում կայանալիք նախագահական ընտրություններում «Վրացական երազանք» դաշինքը հանդես է գալու միասնական թեկնածուով: Այս մասին հայտարարել է տվյալ դաշինքի կազմում ներառված «Ազատ դեմոկրատներ» կուսակցության նոր առաջնորդ Իրակլի Կադագիաշվիլին:
Վերջինս, սակայն, չի կոնկրետացրել՝ արդյո՞ք նախագահական ընտրություններում «Վրացական երազանքի» միասնական թեկնածուն լինելու է «Ազատ դեմոկրատներ» կուսակցության նախկին առաջնորդ, ներկայիս պաշտպանության նախարար և փոխվարչապետ Իրակլի Ալասանիան:
Կադագիաշվիլիի խոսքերով՝ դեռ չի եկել միասնական թեկնածուի հարցում ընտրություն կատարելու ժամանակը. «Մեր նախապատրաստության գլխավոր վեկտորը նախագահական ընտրություններն են, որոնք տեղի են ունենալու հաջորդ տարվա հոկտեմբերին:
Մենք նաև նախապատրաստվում ենք 2014 թվականին կայանալիք տեղական ինքնակառավարման մարմինների ընտրություններին: Նախագահական ընտրություններում դաշինքն ունենալու միասնական թեկնածու, սակայն դեռ վաղ է խոսել կոնկրետ անձանց մասին»:
