Այս տարի արձանագրվել է սննդային թունավորման՝ բոտուլիզմի 4 դեպք՝ 6 տուժածով, մահվան դեպք չի արձանագրվել: Լրագորողների հետ հանդիպման ընթացքում տեղեկացրեց ՀՀ առողջապահության նախարարության պետական տեսչության հիգիենիկ բաժնի պետ Մարգարիտա Բաբայանը` հավելելով, որ այս տարի եղել է սնկից թունավորումների 20 դեպք՝ 29 տուժածով, իսկ անցած տարի ամբողջ տարվա ընթացքում եղել է 16 դեպք՝ 24 տուժածով:
Բոտուլիզմի դեպքերը ընդհանուր առմամբ նվազել են, սնկային թունավորումների դեպքերը` աճել: Սնկային թունավորումները տարածված են հատկապես Լոռու մարզում:
Մարգարիտա Բաբայանը նաև վստահեցրեց. այս տարի այլ մթերքներից սննդային թունավորումներ դեռ չեն արձանագրվել: «Անցած տարի դեպքեր ենք ունեցել, երբ թունավորվել են տնային պայմաններում պատրաստված խմորեղենից»,- ասաց նա:
«Սննդային թունավորումից խուսափելու համար պետք է պահպանել սննդի պատրաստման հիգիենայի կանոնները, ջերմային ռեժիմը: Միս պարունակող կերակրատեսակները պետք է պահել սառնարանում, փակ տարաների մեջ»,- ասաց բանախոսը:
Նա հասարակությանը կոչ արեց անպայման շատ լավ լվանալ միրգն ու բանջարեղենը, հակառակ դեպքում մանրէները բազմանում են:
